გვანცა ყუფარაძე მის საქმეზე ადამიანის უფლებათა ევროპული სასამართლოს გადაწყვეტილებას გამოეხმაურა და თქვა, რომ სტრასბურგის სასამართლოს გავლენის ქვეშ მოქცევა ისევე შეიძლება, როგორც "ქართული სასამართლოს დაქვემდებარება":

"სანდო წყაროსგან მქონდა ინფორმაცია, რომ სტრასბურგის სასამართლოში მყოფ ნონა წოწორიასა და ძველი რეჟიმის წარმომადგენლებს შორის არსებობდა მჭიდრო კავშირი. მაფრთხილებდნენ, რომ წოწორიასა და თამარ ალანიას შორის არის კავშირი. ამიტომ იბრძოდა ალანია ასე ჯიუტად საქართველოში შესარჩევ ეტაპზე გასვლისათვის, რადგან შემდეგ მას ჰქონდა გარანტია, რომ სტრასბურგში აირჩევდნენ."

ყუფარაძის თქმით, ის არ აპირებს გადაწყვეტილების დიდ პალატაში გასაჩივრებას, რადგან ეს დამამცირებლად მიაჩნია:

"მე წავაგე დავა იმ პირობებში, როდესაც სასამართლოს აღნიშნულ დარღვევებზე ჰქონდა ამომწურავი ინფორმაცია. საქმე წავაგე იმ პირობებში, როდესაც სახელმწიფომ უარი განაცხადა დაცვაზე და კონტრარგუმენტების წარდგენაზე... მე აბსოლუტურად დარწმუნებული ვიყავი რომ ეს იქნებოდა უპრეცედენტო გადაწყვეტილება."

გუშინ ცნობილი გახდა, რომ ადამიანის უფლებათა ევროპულმა სასამართლომ საქმეში გვანცა ყუფარაძე საქართველოს წინააღმდეგ დარღვევები ვერ გამოავლინა. ყუფარაძე სტრასბურგში სამ მუხლს ასაჩივრებდა.

2007 წელს 14 წლის გვანცა ყუფარაძეს კლასელის განზრახ მკვლელობის ბრალდებით 5 წლით თავისუფლების აღკვეთა და 5 წლით პირობითი მსჯავრი მიუსაჯეს. ამავე წელს სააპელაციო სასამართლომ გვანცა ყუფარაძის განაჩენი ძალაში დატოვა, ხოლო 2008 წელს უზენაესმა სასამართლომ საქმე წარმოებაში არ მიიღო.

სააპელაციო სასამართლოში არასრულწლოვანი გვანცა ყუფარაძის საქმეს განიხილავდა თამარ ალანია. ის სტრასბურგის სასამართლოში წარსადგენი მოსამართლეების შესარჩევმა კომისიამ კიდევ სამ კანდიდატთან ერთად შეარჩია, თუმცა სტრასბურგს მთავრობას მისი კანდიდატურა არ წარუდგინა. არასამთავრობო ორგანიზაციების ნაწილი აცხადებდა, რომ გვანცა ყუფარაძის მიმართ სამართლიანი სასამართლოს უფლება და უდანაშაულობის პრეზუმფცია დაირღვა.