ისრაელმა დააკავა ღაზის სექტორისაკენ მიმავალი ჰუმანიტარული დახმარების გემი, რომელზეც გრეტა თუნბერგი და სხვა ცნობილი აქტივისტები იმყოფებოდნენ. დაკავებული მგზავრები ისრაელში გადაიყვანეს.

"თავისუფლების ფლოტილიის კოალიციამ" (FFC) განაცხადა, რომ ისრაელის სამხედრო ძალები "თავს დაესხნენ" და "საიდუმლოდ მოიპოვეს კონტროლი" გემზე სახელად "მადლინი", რომელიც ცდილობდა სიმბოლური ჰუმანიტარული დახმარება მიეწოდებინა ღაზასთვის, სადაც ისრაელსა და ჰამასს შორის მიმდინარე ომმა, რომელიც უკვე 600-ზე მეტი დღეა გრძელდება, და ისრაელის მიერ დაწესებულმა 11-კვირიანმა სრულმა ბლოკადამ ღაზას 2.1 მილიონამდე მცხოვრები კიდევ უფრო ღრმა შიმშილის კრიზისში ჩაძირა.

"მადლინის" ეკიპაჟი

"მადლინის" ეკიპაჟი

ფოტო: Al Jazeera

"მადლინის" მგზავრებს შორის იყვნენ ეკოლოგიური აქტივისტი გრეტა თუნბერგი და რიმა ჰასანი — საფრანგეთის ევროპარლამენტის წევრი.

"გემი უსაფრთხოდ მიემართება ისრაელის სანაპიროსკენ. მგზავრები თავიანთ ქვეყნებში დაბრუნდებიან," — ნათქვამია ისრაელის საგარეო საქმეთა სამინისტროს განცხადებაში, რომელიც გამოქვეყნდა X-ზე დღეს გამოქვეყნდა.

საგარეო საქმეთა სამინისტრომ ასევე გამოაქვეყნა ვიდეო, სადაც ჩანან "მადლინის" ეკიპაჟის წევრები, რომლებიც გვერდიგვერდ სხედან ნარინჯისფერ სამაშველო ჟილეტებში. სამხედრო მოსამსახურე მათ წყალსა და შეფუთულ სენდვიჩებს აწვდის.

FFC-მ მანამდე განაცხადა, რომ გემი "შეიარაღებული თავდასხმის ქვეშ მოექცა საერთაშორისო წყლებში," – ამის შესახებ მათ Telegram-ზე დაწერეს.

"ისრაელის ძალებმა გემს ალყა შემოარტყეს, ასხურებენ თეთრ, საღებავის მაგვარ ნივთიერებას. კომუნიკაცია გაწყვეტილია და რადიოში უცნაური, შემაშფოთებელი ხმებია," — ნათქვამია FFC-ის განცხადებაში. ისრაელის საგარეო საქმეთა სამინისტროს მიერ გამოქვეყნებულ ვიდეოში ჩანს, როგორ გადასცემს საზღვაო ძალების თანამშრომელი რადიომესიჯს გემს, რომელშიც აცხადებს, რომ "ღაზას სანაპიროსთან საზღვაო ზონა დახურულია."

ვიდეოში, რომელიც გემიდან პირდაპირ ეთერში გადმოიცემოდა, აქტივისტმა იასმინ აკარმა აჩვენა გემბანზე დასხმული თეთრი სითხე და თქვა, რომ ის ისრაელის ძალებმა დაასხეს. მოგვიანებით ის ამბობს, რომ სითხემ თვალი აუწვა.

მას შემდეგ, რაც გემთან კავშირი დაიკარგა, FFC-მ დაიწყო წინასწარ ჩაწერილი ვიდეომესიჯების გამოქვეყნება თუნბერგისა და ეკიპაჟის სხვა წევრებისგან. "თუ ამ ვიდეოს უყურებთ, ეს ნიშნავს, რომ საერთაშორისო წყლებში ისრაელის საოკუპაციო ძალებმა — ან მათმა მხარდამჭერებმა — გაგვიტაცეს," — თქვა თუნბერგმა ვიდეოში.

FFC-ის განცხადებაში ნათქვამია, რომ ისრაელმა "სრული დაუსჯელობით" იმოქმედა და რომ გემზე არსებული ჰუმანიტარული ტვირთი — რაც შეიცავდა ბავშვთა ფორმულას, საკვებსა და სამედიცინო საშუალებებს — მათ ჩამოართვეს. ისრაელის განცხადებით, ეს დახმარება ღაზაში ჰუმანიტარული არხებით გაიგზავნება.

"ისრაელს არ აქვს არანაირი სამართლებრივი უფლება "მადლენის" საერთაშორისო მოხალისეების დასაკავებლად," — განაცხადა ჰუაიდა არაფმა, ადამიანის უფლებათა ადვოკატმა და "თავისუფლების ფლოტილიის" ორგანიზატორმა — "ეს გატაცება აშკარად არღვევს საერთაშორისო სამართალს და უგულებელყოფს საერთაშორისო სასამართლოს (ICJ) სავალდებულო გადაწყვეტილებებს, რომლებიც მოითხოვს ჰუმანიტარული წვდომის შეუფერხებელ უზრუნველყოფას ღაზისთვის."

ისრაელი არაერთხელ აცხადებდა, რომ არ დაუშვებდა გემს ღაზაში ჩასვლას და მას "სელფის იახტად" მოიხსენიებდა, რომელსაც "ცნობილი სახეები" გადაჰყავდა.