დღეს, 23 აპრილს, ლონდონში უკრაინასა და რუსეთს შორის ცეცხლის შეწყვეტის მიზნით დაგეგმილ მოლაპარაკებებში აშშ-ის სახელმწიფო მდივანი მარკო რუბიო და სპეციალური წარმომადგენელი სტივ უიტკოფი აღარ მიიღებენ მონაწილეობას. ამის შესახებ BBC წერს.

მოლაპატაკებების მაგიდასთან იქნებია: დიდი ბრიტანეთის, საფრანგეთის, გერმანიის, უკრაინისა და აშშ-ის მაღალი თანამდებობის პირები, ხოლო დიდი ბრიტანეთის საგარეო საქმეთა მინისტრი დევიდ ლემი უკრაინელ კოლეგასთან ორმხრივ შეხვედრას გამართავს.

რუბიოსა და უიტკოფის ნაცვლად მოლაპარაკებებს დონალდ ტრამპის უკრაინაში სპეციალური წარმომადგენელი, გენერალი კიტ კელოგი დაესწრება.

ამასობაში, უკრაინის პრეზიდენტმა ვოლოდიმირ ზელენსკიმ გამორიცხა ოკუპირებული ყირიმის რუსეთის ტერიტორიად აღიარება, მას შემდეგ, რაც გავრცელდა ინფორმაცია, რომ ეს შესაძლოა მოლაპარაკებებზე განიხილონ.

თეთრმა სახლმა განაცხადა, რომ უიტკოფი ამ კვირაში მოსკოვში გაემგზავრება რუსეთის პრეზიდენტ ვლადიმერ პუტინთან მეოთხე შეხვედრისთვის.

ეს ყველაფერი Financial Times-ის რეპორტაჟის ფონზე მოხდა, რომლის თანახმადაც რუსეთი შესაძლოა მზად იყოს შეაჩეროს ომი უკრაინაში ყირიმზე რუსეთის სუვერენიტეტის აღიარების სანაცვლოდ.

ზელენსკიმ განაცხადა, რომ მასთან ასეთი წინადადებები არ ყოფილა განხილული და უარყო ყირიმის რუსეთის ტერიტორიად აღიარება.

"უკრაინა იურიდიულად არ ცნობს ყირიმის ოკუპაციას. სალაპარაკო არაფერია", — თქვა მან სამშაბათს საღამოს გამართულ პრესკონფერენციაზე.

პუტინმა ცალმხრივად გამოაცხადა დროებითი ცეცხლის შეწყვეტა აღდგომის შაბათ-კვირისთვის, თუმცა დიდი ბრიტანეთის თავდაცვის მინისტრმა ჯონ ჰილიმ სამშაბათს თემთა პალატას განუცხადა, რომ ბრიტანეთის სამხედრო დაზვერვამ ვერ აღმოაჩინა თავდასხმების შენელების მტკიცებულება.

"მიუხედავად იმისა, რომ პუტინმა განაცხადა, რომ აღდგომის ზავი გამოაცხადა, მან ის დაარღვია. მიუხედავად იმისა, რომ პუტინი ამბობს, რომ მშვიდობა სურს, მან უარყო სრული ცეცხლის შეწყვეტა და მიუხედავად იმისა, რომ პუტინი ამბობს, რომ ბრძოლის დასრულება სურს, ის მოლაპარაკებებში დროის მოგებას აგრძელებს", — განაცხადა ჯონ ჰილიმ.

ოთხშაბათს დილით, უკრაინის ქალაქ მარჰანეცში ცხრა ადამიანი დაიღუპა მას შემდეგ, რაც რუსულმა დრონმა ავტობუსს დაარტყა.

შეფასებულია, რომ 2022 წლის 24 თებერვალს რუსეთის მიერ უკრაინაში შეჭრის შემდეგ ყველა მხრიდან ასობით ათასი ადამიანი დაიღუპა ან დაშავდა და ამჟამად მსოფლიოში თითქმის შვიდი მილიონი უკრაინელი ლტოლვილადაა რეგისტრირებული.

კონფლიქტი ათ წელზე მეტი ხნის წინ, 2014 წელს დაიწყო, როდესაც უკრაინის პრორუსი პრეზიდენტი ჩამოაგდეს.