"ვინმე დაგჩაგრავს? - გუგავა მოვა, თქვენ არ დაგჭირდებათ მისვლა. ავად გახდებით? - გუგავა მოვა. ბანკი მოვა გამოსასახლებლად? - გუგავა მოვა. წყალი გასკდება? - გუგავა მოვა. გზა გაითხრება? - გუგავა მოვა. რამე გაჭირვება გექნებათ? - გუგავა იქნება თქვენს გვერდით", - ამ სიტყვებით ლეიბორისტული პარტიის ლიდერმა, შალვა ნათელაშვილმა თბილისის მერობის კანდიდატად გიორგი გუგავა წარადგინა.

ნათელაშვილის თქმით, გიორგი გუგავა ყოველთვის იდგა საქართველოს გადარჩენისათვის ბრძოლის ბარიკადებზე და ასეთი იქნება მაშინაც, თუ თბილისის მერი გახდა:

"მსოფლიომ იცის, რომ თუ თბილისი ფეხზე დადგება, საქართველოს ვერავინ ვერ დაამარცხებს. თბილისს ისეთი მერი უნდა, რომელიც არ დაუშვებს მილიარდერების ბატონობას დედაქალაქსა და ქვეყანაზე."