2026 წელს ფეხბურთის მსოფლიო ჩემპიონატის ჩატარება ამერიკის შეერთებულ შტატებში, კანადასა და მექსიკაში იგეგმება, სადაც ამერიკული ფეხბურთის ფინალური მატჩის ცნობილი მუსიკალური შესვენების მსგავს შოუს ვიხილავთ.

ჯერჯერობით არაა ცნობილი, შესვენებაზე რომელ მუსიკოსებს უნდა ველოდოთ, თუმცა, მითქმა-მოთქმის დონეზე არსებობს ვარაუდი, რომ სპორტის ყველაზე დიდი მოვლენის მთავარ პერფორმერად კანადელი რეპერის, დრეიკის ვარიანტი განიხილება.

რამდენიმე დღის წინ FIFA-ს პრეზიდენტი, ჯანი ინფანტინო ამერიკული ტელეარხის, FOX 5-ის შოუში Good Day New York სტუმრად იყო მისული, სადაც მსოფლიო ჩემპიონატზე და მის მუსიკალურ გაფორმებაზეც ისაუბრა.

"მუსიკალური შესვენებისთვის ერთი კარგი იდეა უნდა შემოგთავაზო — დრეიკი!" — უთხრა ინფანტინოს წამყვანმა როზანა სკოტომ — "შენც ხომ იყავი სუპერ ბოულზე? კენდრიკმა ის საქვეყნოდ გამოლანძღა."

"და დაპირისპირება შევქმნათ, ჰო? ძალიან კარგი იდეაა" — თქვა ინფანტინომ დრეიკისა და კენდრიკ ლამარის ცნობილ რეპ-ბრძოლაზე — "სხვათაშორის, როცა მსოფლიო ჩემპიონატის მასპინძელი ქალაქების სია გავავრცელეთ, დრეიკიც ჩვენთან ერთად იყო. მისი ნომერი სადღაც უნდა მქონდეს."

ინფანტინომ ფეხბურთის მსოფლიო ჩემპიონატის მუსიკალურ შესვენებას "ისტორიაში საუკეთესო შოუ" უწოდა. დადასტურებული ინფორმაციით, შოუს პროდიუსერი Coldplay-ს კრის მარტინი იქნება.

"მსოფლიოს სხვადასხვა კუთხიდან 2 მილიარდზე მეტი მაყურებელი გვყავს. ეს ამერიკული ფეხბურთის მაყურებელზე 20-ჯერ მეტია, ამიტომ დიდი მოლოდინები გვაქვს. უამრავი სურპრიზის აღმოსაჩენად მატჩებს უნდა უყუროთ — ეს იქნება საერთაშორისო მასშტაბის, სხვადასხვა ენასა და სხვადასხვა ქვეყნებში ჩატარებული საოცარი სანახაობა."

მსოფლიო ჩემპიონატი 2026 წლის 12 ივნისს დაიწყება და სამხრეთ და ჩრდილოეთ ამერიკის სხვადასხვა ქალაქებში ჩატარდება. ჩემპიონატს კანადის ორი ქალაქი, ტორონტო და ვანკუვერი უმასპინძლებენ.

იმ შემთხვევაში, თუ დრეიკი ფეხბურთის 2 მილიარდზე მეტ ფანს თავისი მუსიკით წარუდგება, ის კენდრიკ ლამარის მიერ სუპერბოულის მუსიკალურ შესვენებაზე დამყარებულ რეკორდს მოხსნის, რაც რეპერების დაპირისპირების "მოსაგებად" წინ გადადგმული დიდი ნაბიჯი იქნება.