პრესის საერთაშორისო ინსტიტუტის პარტნიორი საერთაშორისო ორგანიზაციები საქართველოს ოფიციალურ პირებს მოწოდებენ, დაუყოვნებლივ და უპირობოდ გაათავისუფლონნეტგაზეთისა და ბათუმელების უკანონოდ დაკავებული დამფუძნებელი, ჟურნალისტი მზია ამაღლობელი და დაასრულონ "მედიის უპრეცედენტო დევნა". განცხადებას სწორედ პრესის თავისუფლებაზე მომუშავე ავტორიტეტული საერთაშორისო ორგანიზაცია პრესის საერთაშორისო ინსტიტუტი (IPI) ავრცელებს.

"ამათლობელი თავდაპირველად 11 იანვარს დააკავეს ადმინისტრაციული წესით მას შემდეგ, რაც მან დაგეგმილი საყოველთაო გაფიცვის შესახებ სტიკერი გააკრა პოლიციის განყოფილების შენობაზე. ის იმავე დღეს გაათავისუფლეს და მალევე პოლიციამ მისი მხარდამჭერების დაკავება დაიწყო. ამან დაპირისპირება გამოიწვია მზია ამაღლობელსა და ირაკლი დგებუაძეს შორის, რის შემდეგაც ამაღლობელს ბრალი დგებუაძისთვის სილის გაწვნაში ედება. მის წინააღმდეგ საქმე საქართველოს სისხლის სამართლის კოდექსის 353(1) მუხლით აღიძრა, რაც მძიმე დარღვევას, პოლიციელზე თავდასხმას გულისხმობს და 4-დან 7 წლამდე პატიმრობით ისჯება. 14 იანვარს მზია ამაღლობელს წინასწარი პატიმრობა შეეფარდა", — წერენ ორგანიზაციები.

საერთაშორისო ორგანიზაციები მოუწოდებენ ქართულ ოცნებას შეწყვიტოს ჟურნალისტების მიმართ პოლიტიკური ნიშნით დევნა და დაუყოვნებლივ გაათავისუფლოს მზია ამაღლობელი.

"საქართველოს ოფიციალურ პირებს მოვუწოდებთ, დაუყოვნებლივ და უპირობოდ გაათავისუფლონ ამაღლობელი და დაასრულონ მედიის ეს უპრეცედენტო დევნა. ამას გარდა, მოვითხოვთ იმ არასათანადო მოპყრობის საფუძვლიანად გამოძიებას, რომლის ატანაც მას მოუწია", — ნათქვამია განცხადებაში.

განცხადებას ხელს აწერენ პრესის საერთაშორისო ინსტიტუტი (IPI); ევროპული ცენტრი პრესისა და მედიის თავისუფლებისთვის (ECPMF), ჟურნალისტების ევროპული ფედერაცია (EFJ), PEN International, ფონდი სამართალი ჟურნალისტებისთვის (JFJ) და ა.შ.