17 თებერვალს, თბილისში მოძრაობა სოციალური დემოკრატიისთვის დაფუძნდა. მოძრაობის დაფუძნების ღონისძიება ეგნატე ნინოშვილის დაბადების დღეზე, მის ბიუსტთან გაიმართა.

პრესრელიზში ნათქვამია, რომ მოძრაობა სხვადასხვა პროფესიის, გამოცდილებისა და ინტერესების მქონე მოქალაქეებს აერთიანებს, რომელთაც სჯერათ, რომ საქართველოს გადარჩენისა და განვითარების ერთადერთი სწორი გზა სოციალური დემოკრატიაა. ისინი არა მხოლოდ აკრიტიკებენ წარსულსა და დღევანდელობას, არამედ აქვთ საერთო ხედვა ქვეყნის უკეთესი მომავლისთვის.

"130 წლის წინ, გურიაში, ეგნატე ნინოშვილის დასაფლავების დღეს დაარსდა პირველი ქართული სოციალ-დემოკრატიული მოძრაობა, რომელმაც ამ ქვეყანას მოუტანა დამოუკიდებლობა. დღეს, 130 წლის შემდეგ, ჩვენ 17 თებერვალს, ეგნატე ნინოშვილის დაბადების დღეზე, მის ბიუსტთან შევიკრიბეთ იმისთვის, რომ გითხრათ — აქ ვართ, ერთად ვართ, მზად ვართ და ჩვენი სახელია მოძრაობა სოციალური დემოკრატიისთვის", — განაცხადა მოძრაობის ერთ-ერთმა დამფუძნებელმა, კონსტიტუციონალისტმა ვახუშტი მენაბდემ.