რუსთავის მეტალურგიული ქარხნის თანამშრომლების ნაწილი ამ წუთებში, ქარხნის ადმინისტრაციული შენობის მიმდებარედ არიან შეკრებილები და ხელფასის გაზრდასა და შრომითი პირობების გაუმჯობესებას მოითხოვენ.

ერთ-ერთი გაფიცული თანამშრომელი "ინფო რუსთავთან" საუბარში ამბობს, რომ თანამშრომლები გაფრთხილების გარეშე გაუშვეს სამსახურიდან, რის გამოც 1 ადამიანს უწევს ორმაგი შრომა, თუმცა ამის მიუხედავად ხელფასი იგივე დარჩა, ხოლო სამუშაო პირობები გაუსაძლისია.

"ეს ერთი თვის უკან ჰქონდათ საუბარი დირექციასთან, რომ ხელფასის მომატებას ითხოვდნენ. თუ არ დაკმაყოფილდებოდა ეს მოთხოვნა, წინააღმდეგ შემთხვევაში მოხდებოდა გაფიცვა. 1 კვირის წინ კიდევ იყო შეხვედრა იგივე მოთხოვნით.

დღეს ჩამობრძანდნენ და იყო შეხვედრა ხელმძღვანელობისგან და ამაზე მიიღეს უარი.

ამას ახლავს წინ, რომ თანამშრომლების შემცირება მოხდა 10%, (400 თანამშრომელი ჰყავთ). თანამშრომლები გაფრთხილების გარეშე გაუშვეს სამსახურიდან.

შემცირების გამო 1 ადამიანს უწევს 2 ადამიანის საქმის შესრულება — წარმოება გაიზარდა ხელფასი იგივე დარჩა, გაუსაძლის პირობებში მუშაობს ხალხი. პრემიები გაუქმდა.

ხელმძღვანელობა თავის ვალდებულებას, თავიანთი პასუხისმგებლობას, თავიანთ მოვალეობას აღარ ასრულებს და მოხდა ეს პროცესი, რომ დღეს გაიფიცა ყოვლად სადნობი და სანამ მოთხოვნები არ დაკმაყოფილდება, მანამდე არ გაგრძელდება მუშაობა.
ჩვენი მოთხოვნაა ეს ადამიანები დააბრუნონ სამსახურებში და ხელფასები გაიზარდოს," — ამბობს გიორგი [გაფიცული თანამშრომელი].

NEWS.On.ge მეტალურგიული ქარხნის წარმომადგენლებს დაუკავშირდება და პასუხის მიღების შემთხვევაში მასალა განახლდება.