ბათუმის საქალაქო სასამართლოში ბათუმელებისა და ნეტგაზეთის დამფუძნებლისა და დირექტორის, მზია ამაღლობელის სასამართლო პროცესი მიმდინარეობს.

მოსამართლე ნინო სახელაშვილია და პროკურატურა მზია ამაღლობელისთვის წინასწარი პატიმრობის შეფარდებას ითხოვს.

მზია ამაღლობელი სასამართლოზე მარია რესას წიგნით — "როგორ დავამარცხოთ დიქტატორი" მივიდა. ამის პარალელურად ბათუმის საქალაქო სასამართლოში ხმაურია. ადგილზე იმყოფებიან მედიის წარმომადგენლები, რომლებიც პროცესში შესვლას ვერ ახერხებენ. ისინი აცხადებენ, რომ სასამართლო დარბაზში თავისუფალი ადგილები არის, მაგრამ მათ მიზანმიმართულად არ უშვებენ.

ბათუმელების და ნეტგაზეთის დამფუძნებელი და დირექტორი, მზია ამაღლობელი 11-12 იანვარს ორჯერ დააკავეს. პირველად სტიკერის გაკვრისთვის, რომელსაც ეწერა: "იფიცება საქართველო 15 იანვარს 15:00 საათზე". მანამდე ამავე საბაბით აქციაზე დააკავეს კიდევ 9 ადამიანი. რამდენიმე საათში დაკავებულთაგან ოთხი — მზია ამაღლობელი, თეონა ბერიძე, ციალა ქათამიძე და ნანა შავაძე გაათავისუფლეს. მალევე აჭარის პოლიციის მთავარ სამმართველოსთან მოულოდნელად ჩოჩქოლი ატყდა და მზია ამაღლობელი მეორედაც დააკავეს ორ სხვა პირთან ერთად.

პროკურატურამ მას ბრალი სისხლის სამართლის კოდექსის 353-ე პრიმა მუხლის პირველი ნაწილით გუშინ წაუყენა, რაც პოლიციელზე თავდასხმას გულისხმობს და 4-7 წლით პატიმრობით ისჯება.