29 დეკემბერს "ოცნების" პრეზიდენტ მიხეილ ყაველაშვილის ინაუგურაციის ცერემონია პარლამენტის შენობაში გაიმართება.

გასული დღეების განმავლობაში მედიაში გავრცელდა სხვადასხვა ცნობები იმ ლოკაციებთან დაკავშირებით, სადაც, პოტენციურად, შესაძლოა ღონისძიება ჩატარებულიყო, თუმცა კანონში "სახელმწიფო მნიშვნელობის სიმბოლოების შესახებ" ვკითხულობთ, რომ "საქართველოს ახალარჩეული პრეზიდენტის მიერ ფიცის დადების ცერემონია იმართება მის მიერ თანამდებობის დაკავების წინ, მისი არჩევის დღიდან მესამე კვირა დღეს, საქართველოს პარლამენტის სასახლეში".

მიუხედავად ამისა, ჯერ არაა ცნობილი, რომელ საათზე დაიწყება ცერემონია ან პარლამენტის რომელ ნაწილში გაიმართება ის.

მოვლენათა პარალელურად, თბილისსა და საქართველოს რეგიონებში უწყვეტი პროტესტი უკვე 27-ე დღეა გრძელდება. მოქალაქეები ხელახალი არჩევნების დანიშვნასა და დაკავებული დემონსტრანტების გათავისუფლებას ითხოვენ.