საიას თავმჯდომარის ნონა ქურდოვანიძის ინფორმაციით, 30-ზე მეტ პირს სისხლის სამართლის ბრალდება აქვს წაყენებული. საია დემონსტრანტების წინააღმდეგ წარმოებული სისხლის სამართლის საქმეების მონიტორინგის შედეგებს აქვეყნებს.

"2024 წლის 28 ნოემბრის შემდეგ საქართველოში დაწყებული მასშტაბური პროტესტის ფონზე 30-ზე მეტი მოქალაქე სისხლის სამართლის წესით დააკავეს და ყველა მათგანს პატიმრობა შეუფარდეს. თუმცა არცერთი სამართალდამცავი, ვინც აქციების მონაწილეებზე ძალადობდა, პასუხისგებაში არ მიცემულა.
საიას მონიტორინგის მიხედვით, სასამართლოებში დაკავებულებისთვის პატიმრობა გამოიყენება ინდივიდუალური გარემოებების გაუთვალისწინებლად. დაკავებულთა შორის არიან სტუდენტები, სოციალურად დაუცველი პირები და ოჯახების ერთადერთი მარჩენლები. ბრალდებები ხშირად არ ეფუძნება დამაჯერებელ მტკიცებულებებს, ხოლო მოსამართლეები ნაკლებად ინტერესდებიან ბრალდების დასაბუთებით.
დაკავებულები მიუთითებენ ძალადობის, დამამცირებელი მოპყრობისა და უფლებების დარღვევაზე, რასაც მოსამართლეები უმეტესად უგულებელყოფენ." — წერია საიას ანგარიშში.

ნონა ქურდოვანიძის განცხადებით, საია დააკვირდა 24 პირის აღკვეთის ღონისძიების სხდომას და ნახა არაერთი დარღვევა. საიას თავმჯდომარე ამბობს, რომ ყველას შეეფარდა პატიმრობა სათანადო დასაბუთების გარეშე.

"ერთმა მოსამართლემ ბრალდებულს ისიც ჰკითხა: აღიარებდა თუ არა ჩადენილ დანაშაულს? და თუ არ აღიარებდა, როგორ ხსნიდა, რომ აქციაზე მყოფი ასიათასი ადამიანიდან ის აირჩიეს? მოსამართლის მხრიდან მსგავსი შინაარსის კითხვის გაჟღერება ბრალდებულს აყენებს თავის მართლების პოზიციაში მაშინ, როცა სისხლის სამართლის საპროცესო კოდექსი მტკიცების ტვირთს არა ბრალდებულს, არამედ ბრალდების მხარეს აკისრებს, ამის საპირწონედ უმეტეს შემთხვევებში მოსამართლე ნაკლებად იყო დაინტერესებული შუამდგომლობის დასაბუთების ნაწილში ბრალდების მხარისთვის დაესვა კრიტიკული შეკითხვები.", — წერს ნონა ქურდოვანიძე.