იურისტი გოგა ხატიაშვილი ჩხრეკის პროცედურასთან დაკავშირებით მნიშვნელოვან ინფორმაციას ავრცელებს

  • პირველ რიგში, პოლიციამ უნდა განგიმარტოთ შეჩერებისა და ზედაპირული შემოწმების განხორციელების მიზეზი/საფუძველი.
  • პოლიციელი მხოლოდ მაშინ არის უფლებამოსილი, პრევენციული ღონისძიების განხორციელების ფარგლებში ზედაპირული შემოწმების მიზნით შეაჩეროს პირი, თუ:
    (1) არსებობს საკმარისი საფუძველი ვარაუდისთვის, რომ პირს თან აქვს ნივთი, რომლის გადატანა შეზღუდულია ან რომელიც საფრთხეს უქმნის მის ან სხვის სიცოცხლესა და ჯანმრთელობას; (2) პირი იმყოფება კანონით განსაზღვრული სპეციალური რეჟიმისადმი დაქვემდებარებული ტერიტორიის ან ობიექტის უშუალო სიახლოვეს, 20 მეტრის რადიუსში;
    (3) არსებობს საკმარისი საფუძველი ვარაუდისთვის, რომ იმ ადგილზე, სადაც პირი იმყოფება, იკრიბებიან საქართველოს ტერიტორიაზე უკანონოდ მყოფი პირები, იმალებიან ძებნილები ან შესაძლებელია ჩადენილ იქნეს სამართალდარღვევა.
  • პირის ზედაპირული შემოწმება გულისხმობს მისი ტანსაცმლის მხოლოდ გარე ზედაპირზე ხელით, სპეციალური ხელსაწყოთი ან საშუალებით შეხებას.
  • ზედაპირული შემოწმება არ მოიცავს ჩხრეკას (ჩანთაში, ჯიბეებში ხელის ჩაყოფას). ჩხრეკა უნდა ჩატარდეს სისხლის სამართლის კოდექსით დადგენილი წესით.
  • შეჩერების ვადა არ უნდა აღემატებოდეს შეჩერებიდან 30 წუთს.
  • ზედაპირული დათვალიერებისას პოლიციელმა აუცილებლად უნდა შეადგინოს ოქმი. თქვენი უფლებაა, ოქმზე ხელი არ მოაწეროთ.
  • თქვენ გაქვთ უფლება, რომ ოქმში შეიტანოთ შენიშვნა (მაგ., თუ მიგაჩნიათ, რომ ზედაპირული დათვალიერება ამ წესების დარღვევით ჩატარდა, მიუთითეთ ეს ოქმში), რომელიც უნდა დაადასტუროთ ხელმოწერით.