ინტერნეტში ახალშექმნილი პლატფორმის ბმული გავრცელდა, რომლის რუკაზეც ჩანს, პარლამენტის სიახლოვეს სად დგას პოლიცია და სპეცრაზმი.

პლატფორმა, რომელზეც მონაცემები ლაივ-რეჟიმში ახლდება, ბიზნესისა და ტექნოლოგიების უნივერსიტეტის სტუდენტების ფეისბუქ-გვერდზე — BTU აქტივობები გამოჩნდა. მოგვიანებით აღნიშნული უნივერსიტეტიდან დაგვიკავშირდნენ და გვითხრეს, რომ გვერდი მათი უნივერსიტეტის სტუდენტებისაა, მაგრამ აპლიკაცია მათ სტუდენტებს არ გაუკეთებიათ. ისიც გვითხრეს, რომ იციან ვინც გააკეთა აპლიკაცია და ისინი თავად გააკეთებენ ამის შესახებ განცხადებას, როცა მასზე მუშაობას დაასრულებენ, რადგან ჯერ ბოლომდე გამართული არ არის და ხარვეზებით მუშაობს.

"ჩვენი სტუდენტების "ფეიჯი" ეს ნამდვილად არის, მაგრამ ამ აპლიკაციის შესახებ გააზიარეს ბმული ინფორმაციის გავრცელებისთვის, რომ ასეთი პროგრამა შეიქმნა. სტუდენტები კავშირში არ არიან. კომუნიკაცია მათთანაც გვაქვს, ვინც შექმნა პლატფორმა. ჯერ სრულ დატვირთვით, გამართულად არ მუშაობს და არ გვინდა ხალხი შეცდომაში შევიყვანოთ, მუშაობენ მის დახვეწაზე. აპლიკაციის შემქმნელები თავად გააკეთებენ განცხადებას", — გვითხრა BTU-ს წარმომადგენელმა.

ამავე ბმულზე ჩანს, რა წერტილებშია შესაძლებელი პირველადი დახმარების მიღება. „უახლოეს მონაცემებში“ კი ჩნდება ცნობები, რომლებითაც აქციის მონაწილეებს აწვდიან მიმდინარე მოვლენების შესახებ ინფორმაციას.