დოდი ხარხელის ადვოკატი, ჯუბა ქათამაძე ამბობს, რომ ჩხრეკა უკანონო იყო და პოლიციას სასამართლოდან განჩინებაც არ ჰქონდა.

3 დეკემბერს დილით, დოდი ხარხელი ბაღთან დააკავეს, სადაც მან შვილი მიიყვანა. მოგვიანებით, აქტივისტის სახლთან შეკრებილი მედიისა და მოქალაქეების თანდასწრებით, ხარხელი სახლში მიიყვანეს, სადაც ჩხრეკის ოპერაცია დაიწყო. ადვოკატის თქმით, ჩხრეკა ძველი გამოძიების საფუძველზე ჩატარდა:

"ძველი გამოძიების საფუძველზე ჩაატარეს ჩხრეკა და ორი ადამიანის პირადი ჩხრეკა. ამოიღეს ტექნიკა, ფოტოაპარატი, მეხსიერების ბარათები და ლეპტოპი. რამდენიმე თვის წინ დაწყებულ გამოძიებაზე ჩხრეკა ჩაატარეს გადაუდებელი აუცილებლობით, ანუ სასამართლოდან განჩინებაც კი არ ჰქონდათ. რა მოხდა გადაუდებელი უცნობია, არ ასაბუთებენ. ფორმალური მიზეზი მოიყვანეს, რომ შემდგომში არ განადგურდეს მტკიცებულებები, თუმცა გამოძიება მიმდინარეობს რამდენიმე თვეა", — განაცხადა ჯუბა ქათამაძემ მედიასთან.

ადვოკატი აღნიშნავს, რომ საფუძვლის გაურკვევლობის გამო, დოდი ხარხელს ოქმზეც არ მოუწერია ხელი და ბაღთან აქტივისტის დაკავებაც პირადი ჩხრეკისთვის მოხდა:

"გადაუდებელი აუცილებლობით ჩხრეკის ჩატარების რეალური საფუძველი ჩვენ ვერ მოვისმინეთ, ამიტომ ოქმზეც ხელი არ მოვაწერეთ. პირადი ჩხრეკის საფუძველი ასე გადაუდებლად არ არსებობდა, განჩინება სასამართლოდან რომ ჰქონოდათ და რაიმე დაესაბუთებინათ, ჩვენი მხრიდანაც დამოკიდებულება სხვანაირი იქნებოდა. როგორც თვითონ მითხრეს და დოდიმაც დაადასტურა, პირადი ჩხრეკისთვის მოხდა ეს ოპერაციაც ბაღთან და ესეც გაუგებარია. იმის თქმა შემიძლია, რომ უკანონო იყო ეს ჩხრეკა, გადაუდებელი აუცილებლობით ჩხრეკის საფუძველი არ არსებობდა. რატომ მოიქცნენ ასე რთული სათქმელია", — ამბობს დოდი ხარხელის ადვოკატი.