პარტია კონსერვატორები საქართველოსთვის თავმჯდომარე, პრორუსი ზურაბ მახარაძე სრულიად საქართველოს კათოლიკოს პატრიარქს, შიო III-ს შეხვდა. ამის შესახებ მახარაძე სოციალურ ქსელში წერს და შეხვედრის ამსახველ ფოტოსაც აქვეყნებს.

მისი თქმით, პატრიარქთან კონსტიტუციური მონარქიის, დემოგრაფიის, აბორტების, სუროგაციისა და რელიგიური გრძნობების შეურაცხყოფის საკითხებზე ისაუბრა.

"დღეს მქონდა პატივი, შევხვედროდი საქართველოს კათოლიკოს-პატრიარქს, უწმინდესსა და უნეტარეს შიო მესამეს!

ვისაუბრეთ კონსტიტუციური მონარქიის, დემოგრაფიის, აბორტების, სუროგაციისა და რელიგიური გრძნობების შეურაცხყოფის საკითხებზე.

პატრიარქისგან მივიღეთ კურთხევა, აღნიშნულ თემებზე ვისაუბროთ და ვიმუშაოთ!

გაგრძელდება ინტენსიური შეხვედრები საერო და სასულიერო პირებთან," — ვკითხულობთ მახარაძის განცახდებაში.

ცნობისთვის, პარტიაში კონსერვატორები საქართველოსთვის მონარქიის თემასთან დაკავშირებით დაპირისპირებაა.

24 ივნისს პარტიის ერთ-ერთმა ლიდერმა, გიორგი ქარდავამ სოციალურ ქსელში დაწერა, რომ "ზურაბ მახარაძის პოზიცია ბატონ-ყმობისა და მეფის მოყვანის შესახებ" აბსურდულია და მხოლოდ "პარტიის მარგინალიზაციას, არასერიოზულობის განცდას" ემსახურება.

"ზურაბ მახარაძის პოზიცია ბატონ-ყმობისა და მეფის მოყვანის შესახებ, თანამედროვე პოლიტიკური, სოციალური, ეკონომიკური და ტექნოლოგიური რეალობის პირობებში, იმდენად აბსურდული და არარეალისტურია, რომ ამ ანაქრონიზმის ჩვენს პოლიტიკურ ძალასთან ასოცირება მხოლოდ მარგინალიზაციას, არასერიოზულობის განცდასა და იმ მრავალწლიანი შრომისა და ღვაწლის გაუფასურებას იწვევს, რომელიც ათასობით ადამიანს აქვს გაწეული.

მით უმეტეს იმ ვითარებაში, როდესაც კონსერვატიული ღირებულებების აღზევება მთელი მსოფლიოს მასშტაბით მიმდინარეობს და საქართველოშიც, მმართველი ძალიდან დაწყებული და ნაციონალური მოძრაობით დასრულებული, არაერთი პოლიტიკური ძალა ცდილობს კონსერვატიულ ღირებულებებთან საკუთარი თავის გაიგივებას და ამ მზარდი პოლიტიკური ნიშის დაკავებას.

სამწუხაროა, რომ ზურას ეს მარტივი ჭეშმარიტება არ ესმის და ყველა შიდა თუ გარე გადაცემაში ამ დამაზიანებელ იდეას ჯიუტად იმეორებს, მიუხედავად იმისა, რომ სრულიად ცხადია: ამ გზით არა თუ ახალი მხარდამჭერების შეძენა არაა შესაძლებელი, პირიქით, პარტიის აქტიური თანამებრძოლების აბსოლუტური უმრავლესობის უკმაყოფილებასაც იწვევს.
პოლიტიკური ორგანიზაცია "კონსერვატორები საქართველოსთვის" ერთგული რჩება იმ ღირებულებებისა და პოლიტიკური ხაზის, რომლებიც დაარსების პირველივე დღიდან აქვს გაცხადებული, და თანმიმდევრულად აგრძელებს ამ გზით სვლას," — წერს ქარდავა.