ორი პირის მიერ ჩაწერილი ვიდეოს მიხედვით, ჩეჩნეთის ლიდერის, რამზან კადიროვის სავარაუდო მკვლელობის მცდელობის შესახებ გავრცელებული ჭორების ავტორად რუსეთის სახელმწიფო სათათბიროს ყოფილი დეპუტატი დაღესტნელი მაგომედ გაჯიევია.

გაჯიევი, რომელიც რუსეთში "უცხოურ აგენტადაა" აღიარებული, დასახელდა პირად, რომელმაც ხალხს კადიროვის მკვლელობის მცდელობის შესახებ ჭორების გავრცელება დაუკვეთა.

რუსული სახელმწიფო მედიასაშუალებa RIA-ს ცნობით, ის თავის ორ თანამემამულეს ჭორის გავრცელებისთვის 2,5 მილიონ დოლარს დაჰპირდა.

9 ოქტომბერს ჩეჩნეთის მეთაურებთან და უშიშროების ძალების ლიდერებთან შეხვედრაზე კადიროვმა, რომელიც ჩეჩნურ ენაზე საუბრობდა, განაცხადა, რომ ჰქონდა ინფორმაცია მისი სიცოცხლის შესაძლო ხელყოფის შესახებ.

მან აღნიშნა, რომ თუ სამი რუსი დეპუტატი – დაღესტანის ფედერაციის საბჭოს სენატორი სულეიმან ქერიმოვი, სახელმწიფო სათათბიროს დეპუტატები ბეკხან ბარახოევი და რიზვან ყურბანოვი არ დაამტკიცებდნენ, რომ ისინი არ მონაწილეობდნენ ამ შეთქმულებაში, ის მათ წინააღმდეგ ოფიციალურად გამოაცხადებda ე.წ. "სისხლის შუღლს".

კარიმოვის მსგავსად, ყურბანოვიც დაღესტნელია, ხოლო ბარახოევი ინგუშეთიდანაა.

კადიროვმა სავარაუდო მკვლელობის შეთქმულება რუსეთის ონლაინ საცალო ვაჭრობის კომპანიის, Wildberries-ის მოსკოვის ოფისში 18 სექტემბერს მომხდარ ინციდენტს დაუკავშირა.

ოთხშაბათს გამოქვეყნებულ 45-წამიან ვიდეოში ორი მამაკაცი, რომლებიც RIA-ს მიერ იდენტიფიცირებული არიან, როგორც აბდულა მამადიბიროვი და მურად გოშდადოვი არ ასახელებენ ყოფილი დეპუტატის სრულ სახელს და მას მოიხსენიებენ, როგორც "მაგა". ადგილობრივი მედიის ცნობით, მამაკაცების მიმართვის ობიექტი გაჯიევია. ვიდეოში მამაკაცებს სახელები და სტატუსი არაა მითითებული.

გამოქვეყნებული ვიდეოს მიხედვით, მამადიბიროვი და გოშდადოვი აცხადებდნენ, რომ კადიროვის მკვლელობის მცდელობის მომზადების შესახებ ინფორმაციის გავრცელებით გაჯიევთან შეთანხმების ნაწილი შეასრულეს, თუმცა დაპირებული ჯილდო არ მიუღიათ.

"ჩვენ გავრისკეთ ჩვენი სიცოცხლით თქვენს გამო. ახლა თქვენ გამორთეთ ტელეფონი", — ამბობენ ისინი.

მათ ასევე აღნიშნეს, რომ ყოფილმა დეპუტატმა მათ სულეიმან კერიმოვის შეურაცხყოფისკენ მოუწოდა.

ზაფხულის განმავლობაში გამოცემა Project, დამოუკიდებელი რუსული მედია იტყობინება, რომ გაჯიევი, კერიმოვის თხოვნით, უცხოური აგენტების რუსულ სიას დაემატა. გავრცელებული ინფორმაციით, კერიმოვმა ყოფილი დეპუტატის წინააღმდეგ სისხლის სამართლის საქმის აღძვრასაც მიაღწია. გავრცელებული ინფორმაციით, მათი უთანხმოების მიზეზი კომერციული კონფლიქტი გახდა.

ორმა მამაკაცმა ვიდეომიმართვაში ასევე მოითხოვა გაჯიევისგან, რომ არანაირი მკვლელობის მცდელობა არ მომზადებულა.

"წადი და უთხარი რამზანს შენი მოლანდებების შესახებ", — თქვა ერთ-ერთმა მამაკაცმა და დასძინა, რომ ყოფილ დეპუტატს ამ ყველაფერზე პასუხისგება მოუწევს.

RIA ანონიმურ წყაროზე დაყრდნობით იტყობინება, რომ გაჯიევს და მის კურატორებს უცხოური სადაზვერვო სამსახურებიდან, მკვლელობის მცდელობის შესახებ ჭორების გავრცელებით, ჩეჩნეთს, დაღესტანსა და ინგუშეთს შორის ეთნიკური კონფლიქტის გაღვივება სურდათ.

გაჯიევი რუსეთის სახელმწიფო სათათბიროს წევრი 2003—2021 წლებში იყო. რუსეთის იუსტიციის სამინისტრომ ის უცხოური აგენტების რეესტრში 2024 წლის მაისში დაამატა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.