რუსეთის პრეზიდენტმა ვლადიმერ პუტინმა ორშაბათს, 4 მაისს უკრაინაში ორდღიანი ზავი გამოაცხადა, რომელიც ძალაში 8 და 9 მაისს უნდა შევიდეს. ინფორმაციას Deutsche Welle ავრცელებს. ეს თარიღები ნაცისტური გერმანიის კაპიტულაციისა და 1945 წელს ევროპაში მეორე მსოფლიო ომის დასრულების წლისთავს აღნიშნავს.

რუსეთის თავდაცვის სამინისტრომ ცალმხრივი შეთავაზება გამოაქვეყნა და ასევე განაცხადა, რომ იმედოვნებს, უკრაინული მხარეც იმავეს გააკეთებს. იმ შემთხვევაში, თუ უკრაინა უარს იტყვის და თავს დაესხმება 9 მაისის ღონისძიებებს მოსკოვში, თავდაცვის სამინისტრომ აღნიშნა, რომ რუსეთი საპასუხოდ "მასირებულ სარაკეტო დარტყმას" მიიტანს უკრაინის დედაქალაქის, კიევის "ცენტრზე".

"მიუხედავად ჩვენს ხელთ არსებული შესაძლებლობებისა, რუსეთი აქამდე ჰუმანიტარული მოსაზრებებით თავს იკავებდა მსგავსი ქმედებებისგან... ჩვენ ვაფრთხილებთ კიევის მოსახლეობას და უცხოური დიპლომატიური მისიების თანამშრომლებს ქალაქის დროულად დატოვების აუცილებლობის შესახებ," — ნათქვამია სამინისტროს განცხადებაში.

სოციალურ ქსელში გამოქვეყნებულ საპასუხო განცხადებაში პრეზიდენტმა ვოლოდიმირ ზელენსკიმ აღნიშნა, რომ უკრაინას რუსეთისგან საომარი მოქმედებების შეწყვეტის შესახებ "არანაირი ოფიციალური მიმართვა" არ მიუღია. მან სანაცვლოდ ცეცხლის შეწყვეტის განსხვავებული, უფრო ადრეული ვადა შესთავაზა.

"ჩვენ გვჯერა, რომ ადამიანის სიცოცხლე უფრო ძვირფასია, ვიდრე ნებისმიერი წლისთავის "აღნიშვნა". ამასთან დაკავშირებით, ჩვენ ვაცხადებთ ცეცხლის შეწყვეტის რეჟიმს, რომელიც დაიწყება 5-დან 6 მაისის ღამის 00:00 საათზე... ჩვენ ვიმოქმედებთ სარკისებურად მითითებული მომენტიდან. დროა რუსეთის ლიდერებმა გადადგან რეალური ნაბიჯები ომის დასასრულებლად, თუკი რუსეთის თავდაცვის სამინისტროს უკვე მიაჩნია, რომ უკრაინის კეთილი ნების გარეშე მოსკოვში აღლუმს ვერ ჩაატარებს," — დაწერა ზელენსკიმ.

პრეზიდენტმა ვლადიმერ პუტინმა ზავის იდეა პირველად გასულ კვირას, აშშ-ის პრეზიდენტ დონალდ ტრამპთან სატელეფონო საუბრისას გააჟღერა. უკრაინამ მოგვიანებით განაცხადა, რომ შეთავაზების შესახებ დეტალებს ვაშინგტონისგან გამოითხოვდა.