გირჩის წევრი ალექსანდრე რაქვიაშვილი ირაკლი კობახიძის განცხადებას სოციალურ ქსელში ეხმიანება და აღნიშნავს, რომ ინფლაციასთან დაკავშირებით მთავრობის შეფასებები რეალობას არ შეესაბამება.

რაქვიაშვილის თქმით, მიუხედავად იმისა, რომ ერთი კვირის წინ კობახიძემ განაცხადა, თითქოს "ინფლაციური პროცესები შენელებულია", საქსტატის მიერ გამოქვეყნებული მონაცემები საპირისპიროზე მეტყველებს.

"ერთი კვირის წინ პრემიერმინისტრმა განაცხადა, რომ "ინფლაციური პროცესები შენელებულია". საქსტატმა კი დღეს საწინააღმდეგო მონაცემები დადო — ფასები კიდევ უფრო სწრაფად იზრდება, ვიდრე ეს დეკემბერში იყო.

ცხადია, ასეც უნდა ყოფილიყო, რადგან ეროვნული ბანკი მილიარდობით ლარს ბეჭდავს, ამიტომ ფასების ზრდაც გარდაუვალია. თუმცა მე უფრო ის მაკვირვებს, რომ პრემიერმინისტრი იმის კურსშიც კი არ არის, თუ რას თვლის საქსტატი, ვინაიდან, ერთი კვირის წინ ოპერატიული მონაცემები უკვე ხელმისაწვდომი იქნებოდა მთავრობისთვის. ვითომ წვრილმანია, მაგრამ მაინც კარგი ილუსტრაციაა იმისა, თუ რამდენად არაკვალიფიციური ხალხია ახლა მთავრობაში," — წერს რაქვიაშვილი.

ცნობისთვის, ირაკლი კობახიძემ აქამდე განაცხადა, რომ "სურსათზე ფასების გაძვირება ტყუილია" და ინფლაციური პროცესები შენელებულია.

"[სურსათის] გაძვირება ერთი რომ არის ტყუილი, იმიტომ, რომ პირიქით, შენელებულია ინფლაციური პროცესები. მაგრამ ჩვენ ამით არ ვკმაყოფილდებით. ჩვენი ამოცანაა, რომ ფასები შემცირდეს, რამდენადაც ეს არის შესაძლებელი. კომისია ამ კვირაში ამთავრებს მუშაობას. ჩვენ სამუშაო პროცესი მთავრობაში გვექნება მომავალ კვირაში და ამის შემდეგ უკვე საბოლოო გეგმით წარვდგებით საზოგადოების წინაშე," — აღნიშნა მან.

შეგახსენებთ, 23 აპრილს პრემიერმინისტრმა თქვა, რომ "ფასებთან დაკავშირებით თვის ბოლომდე დასრულდება სამუშაო პროცესი, რის შემდეგაც საზოგადოებას გავაცნობთ ჩვენს დასკვნებს და შესაბამისად, გეგმას".