10-11 მაისს ნიქოზიაში ევროპულ საქმეთა მინისტრების არაფორმალური შეხვედრა გაიმართება, რომელსაც ევროკავშირის წევრობის პოტენციური და კანდიდატი ქვეყნების წარმომადგენლები დაესწრებიან. "ნეტგაზეთის" ცნობით, საქართველო მინისტერიალზე მიწვეული არაა.

"საქართველოს მთავრობის ქმედებათა კურსის გათვალისწინებით, რომელიც ეწინააღმდეგება ევროკავშირის ფუძემდებლურ ღირებულებებსა და პრინციპებს, საქართველოს გაწევრიანების პროცესი 2024 წელს დე ფაქტო შეჩერდა. აქედან გამომდინარე და წინა თავმჯდომარეობების პრაქტიკის გათვალისწინებით, საქართველო მიწვეული არაა", — განუცხადეს "ნეტგაზეთს" კვიპროსის თავმჯდომარეობის პრესსამსახურში.

მათივე თქმით, ევროკავშირი მზადაა, მხარი დაუჭიროს ქართველი ხალხის ევროპულ მისწრაფებებსა და ქვეყნის გზას გაწევრიანებისკენ იმ შემთხვევაში, თუ საქართველოს ხელისუფლება შეიცვლის მოქმედებათა ამჟამინდელ კურსს.

მინისტერიალის ანონსში ნათქვამია, რომ "ევროკავშირის გაფართოება დღის წესრიგის საკვანძო ნაწილი იქნება, რომელშიც მონაწილეობას მიიღებენ კანდიდატი და პოტენციური კანდიდატი ქვეყნები".

"ევროკავშირის გაფართოება დღის წესრიგის მნიშვნელოვანი ნაწილი იქნება, რომელშიც მონაწილეობას მიიღებენ კანდიდატი და პოტენციური კანდიდატი ქვეყნები. ეს სესია შექმნის შესაძლებლობას გაფართოებასთან დაკავშირებით ღია და მომავალზე ორიენტირებული აზრთა გაცვლა მოხდეს, რაც ასახავს ჩვენს საერთო ერთგულებას სანდო და ინკლუზიური ევროპული მომავლის მიმართ.

პოლიტიკური დისკუსიების პარალელურად, პროგრამა ითვალისწინებს არაფორმალური ურთიერთობის შესაძლებლობებს კულტურულ გარემოში", — ნათქვამია მინისტერიალის ანონსში.