გერმანიის ქალაქ ლაიფციგში ავტომობილი ხალხში შევარდა, რის შედეგადაც ორი ადამიანი დაიღუპა და დაახლოებით 20 დაშავდა, მათგან სამი მძიმე მდგომარეობაშია. ინფორმაციას ამის შესახებ Deutsche Welle ავრცელებს.

გავრცელებული ცნობით, შემთხვევა ქალაქის ცენტრში, საფეხმავლო სავაჭრო ტერიტორიაზე — გრიმაიშეს ქუჩაზე მოხდა, რომელიც აუგუსტუსპლაცს ცენტრალურ ბაზართან აკავშირებს. შემთხვევის ადგილზე ახლოს წმინდა ნიკოლოზის ეკლესია და ლაიფციგის უნივერსიტეტი მდებარეობს.

ადგილობრივი ხელისუფლების განცხადებით, ავტომობილის მძღოლი — 33 წლის გერმანიის მოქალაქე — შემთხვევის ადგილზე დააკავეს. პოლიციის თქმით, ის საფრთხეს ამ დროისთვის აღარ წარმოადგენს.

დაღუპულია 63 წლის ქალი და 77 წლის კაცი, ორივე გერმანიის მოქალაქე. პროკურატურამ საქმე მინიმუმ ორი ადამიანის მკვლელობის მცდელობის მუხლებით აღძრა.

თვითმხილველების ინფორმაციით, თეთრი ფერის ავტომობილი დიდი სიჩქარით მოძრაობდა. შემთხვევის შემდეგ ტერიტორია სამართალდამცველებმა გადაკეტეს, ადგილზე მობილიზებული იყვნენ სასწრაფო დახმარების ბრიგადები, პოლიცია და სამაშველო სამსახურები.

ლაიფციგის მერმა ბურკჰარდ იუნგმა დაღუპულთა ოჯახებს სოლიდარობა გამოუცხადა.

"ეს შოკისმომგვრელია. ახლა მხოლოდ ის შემიძლია გავაკეთო, რომ სოლიდარობა გამოვუცხადო მსხვერპლთა ოჯახებს.

სხვა დანარჩენი პოლიციისა და საგამოძიებო ორგანოების მუშაობით უნდა დადგინდეს," — განუცხადა მან ადგილზე მყოფ ჟურნალისტებს.

ინციდენტს გამოეხმაურა საქსონიის შტატის პრემიერმინისტრი, მიხაელ კრეჩმერიც, რომელმაც აღნიშნა, რომ მომხდარს აუცილებლად საფუძვლიანად გამოიძიებენ

პოლიცია ამ ეტაპზე ვერ ადასტურებს, იყო თუ არა შემთხვევა განზრახი. თუმცა, მსგავსი ფაქტები გერმანიაში ბოლო წლების განმავლობაში არაერთხელ დაფიქსირებულა.