ირაკლი კობახიძემ და ეკონომიკისა და მდგრადი განვითარების სამინისტრომ რკინიგზის "ისტორიული განახლების" პროექტი წარადგინეს. მასშტაბური რეფორმა, რომელიც 10-წლიან გეგმას ეფუძნება, სავაგონო პარკის სრულ მოდერნიზაციას, ინფრასტრუქტურულ განვითარებასა და ფინანსურ გაჯანსაღებას ითვალისწინებს.

ჟურნალისტებთან საუბრისას კობახიძემ ხაზი გაუსვა რკინიგზაში გატარებულ ეფექტიან რეფორმებსა და კორუფციასთან ბრძოლის შედეგებს. მისი თქმით, გასული წლის განმავლობაში რკინიგზამ მნიშვნელოვანი ფინანსური რესურსების დაზოგვა შეძლო.

"ამ ერთი წლის განმავლობაში ჩვენ გვაქვს უკვე მნიშვნელოვანი, ხელშესახები შედეგები საქართველოს რკინიგზის გაჯანსაღების მიმართულებით. განხორციელდა ოპტიმიზაცია სხვადასხვა მიმართულებით. პირველ რიგში, შევეხები კადრების ოპტიმიზაციას. საქართველოს რკინიგზაში შემცირდა 1 000 საშტატო ერთეული, რაც ერთი შეხედვით წარმოუდგენელი მაჩვენებელია, თუმცა ძალიან კარგად ჩანს, თუ რა ტიპის ინსტიტუციური პრობლემები იყო საქართველოს რკინიგზაში. 1 000 საშტატო ერთეულის შემცირების ფონზე გაუმჯობესდა მართვის ეფექტიანობა. ამ ყველაფრის შედეგად, ოპტიმიზაციის შედეგად საქართველოს რკინიგზა წლიურ ჭრილში ზოგავს 24 მლნ ლარს. [...] ასევე, გვქონდა ერთჯერადი ძალიან მნიშვნელოვანი დანაზოგი, შესყიდვების ოპტიმიზაციის ხარჯზე და საკონტრაქტო ღირებულების შემცირების ხარჯზე ერთჯერადად დაიზოგა საქართველოს რკინიგზაში 190.4 მლნ ლარი",— განაცხადა კობახიძემ.

კობახიძემ ასევე დააანონსა 1.7 მილიარდი დოლარის მოცულობის ინვესტიცია, რომელიც რკინიგზას რეგიონში ერთ-ერთ ყველაზე კონკურენტუნარიან გადამზიდავად აქცევს.

"ძალიან მნიშვნელოვანია, რომ პირველად ამ ბოლო წლების განმავლობაში, ჩამოყალიბდა რკინიგზის განვითარების ერთიანი ხედვა, 10-წლიანი გეგმა, სადაც ასახულია რკინიგზის განვითარების ყველა მნიშვნელოვანი მიმართულება, მათ შორის, აქ საუბარია სავაგონო და სალოკომოტივო პარკის სრულ განახლებაზე, 50 ახალი ლოკომოტივი და 1 500 ახალი ვაგონი იქნება შეძენილი საქართველოს რკინიგზის მიერ, ასევე, 10 ახალი სამგზავრო მატარებელი, რაც ხელს შეუწყობს ტვირთბრუნვის მნიშვნელოვნად გაზრდას, გაზრდის კომფორტს და შეამცირებს გადაადგილების დროს ჩვენი მგზავრებისა და სტუმრებისთვის", — თქვა კობახიძემ.

პრეზენტაციაზე ეკონომიკისა და მდგრადი განვითარების მინისტრის მოადგილემ, მარიამ ქვრივიშვილმა, ყურადღება გაამახვილა ტვირთბრუნვისა და მგზავრთნაკადის გაუმჯობესების კონკრეტულ ვადებსა და ანაკლიის პორტის მნიშვნელობაზე.

"ჩვენ ვიწყებთ საქართველოს რკინიგზის ისტორიულ განახლებას — პროცესს, რომელიც ფუნდამენტურად გარდაქმნის კომპანიას. ვიწყებთ სავაგონო და სალოკომოტივო პარკის სრულ განახლებას. განხორციელდება 50 ახალი ლოკომოტივისა და 1500 ვაგონის შეძენა და ამ მიმართულებით გათვალისწინებულია 1 მილიარდ ლარზე მეტი ინვესტიცია, რაც მოგვცემს შესაძლებლობას, ქვეყნის გადაკვეთის დრო 24 საათიდან 12 საათამდე შევამციროთ და ამასთან გავაორმაგოთ ქვეყნის სატრანსპორტო გამტარუნარიანობა", — განაცხადა ქვრივიშვილმა.

მან ასევე ისაუბრა ანაკლიის ღრმაწყლოვანი ნავსადგურისა და რკინიგზის ინტეგრირებულ განვითარებაზე.

"რკინიგზა არის უფრო დიდი, ინტეგრირებული სისტემის ნაწილი და ამ ტვირთნაკადს სჭირდება ძლიერი საზღვაო კარიბჭე. სწორედ ამიტომაა ანაკლიის ღრმაწყლოვანი ნავსადგურის პროექტი ლოგიკური გაგრძელება და დამაგვირგვინებელი ელემენტი. სახელმწიფო უკვე აშენებს საზღვაო ინფრასტრუქტურას, ხოლო უახლოეს პერიოდში დაიწყება პორტთან დამაკავშირებელი გზისა და 18 კილომეტრიანი სარკინიგზო ხაზის მშენებლობა", — განაცხადა ქვრივიშვილმა.

რეფორმის შედეგად, 2026 წლის აგვისტოში დასრულდება თბილისი-ბათუმის ხაზის რეაბილიტაცია, რაც მგზავრობის დროს 4 საათამდე შეამცირებს. ასევე, 2027 წელს აღდგება ბორჯომი-ბაკურიანის ისტორიული "კუკუშკა". ჯამში, საქართველოს რკინიგზის წმინდა მოგება უკვე 30%-ითაა გაზრდილი, რაც მყარ საფუძველს ქმნის ქვეყნის ეკონომიკური გაძლიერებისთვის "შუა დერეფნის" ფარგლებში.