ევროპარლამენტის საგარეო საქმეთა კომიტეტმა (AFET) საქართველოსთან დაკავშირებით ახალი, მკაცრი ანგარიში დაამტკიცა. დოკუმენტს მხარი 53-მა ევროპარლამენტარმა დაუჭირა, 14 წინააღმდეგი იყო, ხოლო 2-მა თავი შეიკავა. ანგარიშში ხაზგასმულია, რომ კანდიდატ ქვეყანასთან ევროკავშირის შემდგომი ურთიერთობა მკაცრად უნდა იყოს დამოკიდებული იმაზე, შეცვლის თუ არა მთავრობა თავის ანტიდემოკრატიულ და ანტიევროპულ კურსს.

ანგარიშის მომხსენებელმა, ევროპარლამენტარმა რასა იუკნევიჩიანემ, ქვეყანაში არსებულ ვითარებას საგანგაშო უწოდა. მისი განცხადებით, ქართული ოცნების ხელისუფლება სისტემატურად ანგრევს დემოკრატიულ ინსტიტუტებს.

"სამწუხაროდ, ჩვენ კიდევ ერთხელ შეგვიძლია განვაცხადოთ, რომ საქართველოში პროგრესი არ არის; პირიქით, ქვეყანა აგრძელებს სწრაფ დაშვებას ავტორიტარული მმართველობისკენ. ქართული ოცნების ხელისუფლებამ გააძლიერა რეპრესიები, რომელთა სამიზნე ოპოზიციური პარტიები, დამოუკიდებელი მედია და სამოქალაქო საზოგადოებაა, ამავდროულად კი სისტემატურად ანგრევს დემოკრატიულ ინსტიტუტებს. პოლიტიკური პატიმრები კვლავ უკანონო პატიმრობაში რჩებიან, ხოლო სახაროვის პრემიის ლაურეატი მზია ამაღლობელი კვლავ პატიმრობაშია მნიშვნელოვანი საერთაშორისო წვდომის გარეშე. პოლიტიკური პატიმრების არსებობა ფუნდამენტურად შეუთავსებელია საქართველოს ვალდებულებებთან ევროკავშირსა და საქართველოს შორის ასოცირების შეთანხმების ფარგლებში," — განაცხადა რასა იუკნევიჩიანემ.

მომხსენებელმა ასევე ხაზი გაუსვა, რომ ევროკავშირის წევრმა ქვეყნებმა აქამდე ძალიან ცოტა გააკეთეს ამ მოვლენებზე რეაგირებისთვის და მათ კოორდინირებული სანქციებისკენ მოუწოდა.

"ამ კონტექსტში, ანგარიში ნათლად აცხადებს, რომ ხელისუფლებასთან ნებისმიერი ურთიერთობა მკაცრად უნდა იყოს განპირობებული ამ კურსის შესაცვლელად გადადგმული კონკრეტული და გადამოწმებადი ნაბიჯებით. ანგარიში კიდევ ერთხელ მოუწოდებს ევროკავშირის წარმომადგენლებს, თავი შეიკავონ რეჟიმის ლეგიტიმაციისგან პოლიტიკური კონტაქტების გზით. ამიტომ, ღრმად დასანანია, თუ რამდენად ცოტა რამ გააკეთეს ევროკავშირის წევრმა ქვეყნებმა ამ მოვლენების საპასუხოდ. ჩვენ ახლა უნდა გადავიდეთ ევროკავშირის მასშტაბით კოორდინირებული სანქციების დაწესებაზე რეპრესიებსა და სახელმწიფო მიტაცებაზე პასუხისმგებელი პირების მიმართ. ჩვენ იმედი გვაქვს, რომ უნგრეთის მთავრობის მემკვიდრე საბოლოოდ მოხსნის ბლოკადას და შესაძლებელს გახდის მიზანმიმართული ზომების მიღებას ბიძინა ივანიშვილისა და ქართული ოცნების ფართო ხელმძღვანელობის წინააღმდეგ," — დასძინა მან.

ევროპარლამენტარები მიიჩნევენ, რომ 2024 წლის ოქტომბრის არჩევნები გაყალბდა და გმობენ ქართული ოცნების გაძლიერებულ ტრაექტორიას სრული ავტორიტარიზმისკენ. ანგარიშში ხაზგასმულია ისეთი პრობლემები, როგორიცაა:

• რეპრესიებზე პასუხისმგებელი პირებისთვის დაუსჯელობის სისტემის შექმნა;
  
  
• ჟურნალისტებისა და უფლებადამცველების შევიწროება;
  
  
• ოპოზიციური ფიგურების დევნა და პარტიების აკრძალვის მცდელობა;
  
  
• აკადემიური ინსტიტუტების ცენტრალიზებული კონტროლი;
  
  
• სამართალდამცავების მიერ წამებისა და არასათანადო მოპყრობის სავარაუდო გამოყენება მომიტინგეებისა და პოლიტპატიმრების მიმართ;

ევროპარლამენტარები მოუწოდებენ ევროკავშირის ყველა ქვეყანას, დააწესონ შეზღუდვები, მათ შორის აქტივების ყოვლისმომცველი გაყინვა და ვიზების აკრძალვა იმ პირების მიმართ, ვინც პასუხისმგებელია "სახელმწიფოს მიტაცებაზე, რეპრესიებსა და რეჟიმის მიერ დაფინანსებულ პროპაგანდაზე".

განსაკუთრებული აქცენტი კეთდება მმართველი პარტიის დამფუძნებელზე. ანგარიში კიდევ ერთხელ დაჟინებით მოითხოვს დაუყოვნებლივ პერსონალურ სანქციებს ბიძინა ივანიშვილის, მისი ოჯახის წევრებისა და კომპანიების წინააღმდეგ, ასევე მისი აქტივების გაყინვას და თანამშრომლობას აშშ-სა და დიდ ბრიტანეთთან.

ევროპარლამენტარები მხარს უჭერენ საქართველოს სუვერენიტეტსა და ტერიტორიულ მთლიანობას, თუმცა შეშფოთებულნი არიან, რომ საქართველოს ხელისუფლება, შესაძლოა, ეხმარებოდეს რუსეთს ევროკავშირის სანქციების გვერდის ავლით (მათ შორის ნავთობის ექსპორტისა და ფინანსური ნაკადების ნაწილში).

კომიტეტის მიერ მიღებულ ანგარიშს ახლა კენჭს ევროპარლამენტის პლენარულ სხდომაზე უყრიან.