ირაკლი კობახიძის 30 აპრილის დადგენილებით, სუს-ის ყოფილი ხელმძღვანელის და ამჟამინდელი სახელმწიფო მინისტრის, მამუკა მდინარაძის მოვალეობები განისაზღვრა.

დადგენილების მიხედვით, სახელმწიფო მინისტრის პოზიცია შექმნის მიზანია:

"სამართალდამცავ ორგანოებს შორის თანამშრომლობის გაძლიერების, ერთობლივი ოპერაციების დაგეგმვის ხელშეწყობის, ინფორმაციის გაცვლის სტანდარტების დანერგვის, ასევე მათი საქმიანობის ეფექტიანობის შეფასებისა და პრობლემური მიმართულებების იდენტიფიცირების, ასევე კონსტიტუციური უფლებამოსილების ფარგლებში, საქართველოს მთავრობის საქართველოს პროკურატურასთან, სახელმწიფო აუდიტის სამსახურსა და სასამართლო ხელისუფლებასთან კოორდინაციის/ კომუნიკაციის მიზნით," — ვკითხულობთ საკანონმდებლო მაცნეში.

რაც გულისხმობს:

  • სახელმწიფო მინისტრი თავისი საქმიანობისას ხელმძღვანელობს საქართველოს კონსტიტუციით, საქართველოს კანონებით, საქართველოს მთავრობის სამართლებრივი აქტებითა და საქართველოს პრემიერმინისტრის ბრძანებებით.
  • სახელმწიფო მინისტრი ასრულებს კანონით გათვალისწინებულ, აგრეთვე საქართველოს მთავრობის დადგენილებებითა და განკარგულებებით და საქართველოს პრემიერმინისტრის ბრძანებით განსაზღვრულ ამოცანებს.

საკანონმდებლო მაცნეში ვკითხულობთ, რომ "სახელმწიფო მინისტრს თანამდებობაზე ნიშნავს და თანამდებობიდან ათავისუფლებს საქართველოს პრემიერმინისტრი".

რა ევალება სახელმწიფო მინისტრს:

  • ძალოვანი უწყებების კოორდინაცია;

"ახორციელებს საქართველოს შინაგან საქმეთა სამინისტროს, საქართველოს სახელმწიფო უსაფრთხოების სამსახურისა და სახელმწიფო დაცვის სპეციალური სამსახურის საქმიანობის საერთო კოორდინაციას".

  • კომუნიკაცია პროკურატურასთან, სასამართლოსა და აუდიტის სამსახურთან;

"საქართველოს მთავრობის სახელით, ახორციელებს კომუნიკაციას სასამართლო ხელისუფლებასთან, საქართველოს პროკურატურასა და სახელმწიფო აუდიტის სამსახურთან".

  • ოკუპირებული ტერიტორიებზე ვითარების შეფასება და მართვა;

"საქართველოს ოკუპირებულ ტერიტორიებზე შექმნილი ვითარების განხილვისა და გაანალიზების, შესაბამისი გამოწვევების, რისკებისა და საფრთხეების შეფასების მიზნით, რომლებიც უშუალოდ უკავშირდება ეროვნული უსაფრთხოებისა და საქართველოს სახელმწიფო ინტერესების დაცვას".

  • ეროვნული უსაფრთხოების კონცეფციების შემუშავების ინიციირება;

"აინიციირებს ეროვნული უსაფრთხოების სფეროში ეროვნული დონის კონცეპტუალური დოკუმენტების შემუშავების პროცესს. [...] მხარს უჭერს საქართველოს პრემიერ-მინისტრის მიერ ეროვნული ინტერესებისთვის საფრთხის შემცველი კრიზისული ვითარების პოლიტიკურ დონეზე მართვას".

"კოორდინაციას უწევს ამ პუნქტის "გ" ქვეპუნქტით გათვალისწინებული უწყებების საქმიანობას ეროვნული უსაფრთხოების სფეროში არსებული მდგომარეობის, შიდა და საგარეო საფრთხეებისა და გამოწვევების იდენტიფიცირების, შეფასების, ანალიზისა და პროგნოზირების მიზნით".

  • "სახელმწიფო საიდუმლოების შესახებ" საქართველოს კანონის შესაბამისად, უზრუნველყოფილია მისთვის სახელმწიფო საიდუმლოებასთან დაშვების გარანტირებული უფლებით;
  • კომპეტენციის ფარგლებში, გამოსცემს ბრძანებებს;

დადგენილების მიხედვით, სახელმწიფო მინისტრს აქვს ბლანკი და ბეჭედი, სახელმწიფო გერბის გამოსახულებით.

სახელმწიფო მინისტრის საქმიანობის მატერიალურ-ტექნიკურ და ორგანიზაციულ უზრუნველყოფასა მთავრობის ადმინისტრაცია ახორციელებს. დადგენილებაში ვკითხულობთ, რომ სახელმწიფო მინისტრის მისამართად მთავრობის ადმინისტრაციაა მითითებული (ინგოროყვას ქ. №7.

შეგახსენებთ, ქართულ ოცნებაში საკადრო ცვლილებები განხორციელდა. შს მინისტრმა გეკა გელაძემ სუს-ის უფროსის პოსტზე მამუკა მდინარაძე ჩაანაცვლა. თავის მხრივ — სუს-ის უფროსი მამუკა მდინარაძე სამართალდამცავი ორგანოების კოორდინაციის საკითხებში სახელმწიფო მინისტრად დაინიშნა და ვიცეპრემიერობასაც ითავსებს. ხოლო შს მინისტრის აჭარის ავტონომიური რესპუბლიკის მთავრობის თავმჯდომარე სულხან თამაზაშვილი გახდა.