2026 წლის მაისიდან On.ge და საქართველოს უნივერსიტეტი მჭიდრო თანამშრომლობას იწყებენ. პარტნიორობის ფარგლებში რეგულარულად მომზადდება ტექნოლოგიური თემატიკის კონტენტი და გავრცელდება როგორც On.ge-ის ვებგვერდზე, ასევე სოციალურ არხებში.

თანამშრომლობას გამოარჩევს ის, რომ ტექნოლოგიებისა და ინოვაციების მიმართულებით ორიგინალურ კონტენტზე ერთი მხრივ, საქართველოს უნივერსიტეტის ლექტორები იმუშავებენ, მეორე მხრივ კი NEXT.On.ge-ის სამეცნიერო და ტექნოლოგიური ჟურნალისტები. მომზადებული კონტენტი ვებგვერდზე, სპეციალურად საქართველოს უნივერსიტეტისთვის შექმნილ, ბრენდირებულ კატეგორიაში მოიყრის თავს. კატეგორიის სახელია "მეტი ინოვაცია" და მას On.ge-ის მთავარ გვერდზე იპოვით.

"საქართველოს უნივერსიტეტი მუდმივად ისწრაფვის, გააძლიეროს ტექნოლოგიური განათლების პოპულარიზაცია და საზოგადოებას გაუზიაროს ცოდნა, რომელიც რეალურად ქმნის მომავალს. სწორედ ამიტომ, ჩვენთვის განსაკუთრებული მნიშვნელობა აქვს On.ge-სთან პარტნიორობას.

ეს პლატფორმა საშუალებას მოგვცემს, უნივერსიტეტის ტექნოლოგიური პროგრამების ხელმძღვანელებმა და ლექტორებმა ფართო აუდიტორიას რეგულარულად გაუზიარონ ექსპერტული ხედვები, ტრენდების ანალიზი და პრაქტიკული ცოდნა სწრაფად განვითარებადი ტექნოლოგიური სამყაროდან.

"მეტი ინოვაცია" — ეს არის ხედვა, რომელიც ასახავს უნივერსიტეტის სტრატეგიულ მიმართულებას: ტექნოლოგიებზე დაფუძნებული განათლების, კვლევის და პრაქტიკული ინიციატივების გაძლიერებას. ინოვაცია დღეს საქართველოს ეკონომიკური და სოციალური განვითარების ერთ-ერთი მთავარი მამოძრავებელი ძალაა, ხოლო უნივერსიტეტისთვის განსაკუთრებით მნიშვნელოვანია იყოს სივრცე, სადაც ახალი იდეები, ტექნოლოგიური ექსპერიმენტები და მომავლის პროფესიონალები ერთად ვითარდებიან.

გვჯერა, რომ ეს თანამშრომლობა მნიშვნელოვნად შეუწყობს ხელს როგორც ტექნოლოგიური განათლების პოპულარიზაციას საქართველოში, ისე საქართველოს უნივერსიტეტის ძლიერი ტექნოლოგიური პოტენციალის უკეთ წარმოჩენას საზოგადოებისთვის", — ამბობს ნინო კალანდია, საქართველოს უნივერსიტეტის კომუნიკაციისა და კვლევის სამსახურის უფროსი.

On.ge-ის სამეცნიერო და ტექნოლოგიური რედაქცია, NEXT.On.ge უკვე 6 წელზე მეტია არსებობს და მკითხველსა თუ მაყურებელს ყოველდღიურად ამარაგებს უახლესი ამბებით სამეცნიერო მიღწევებისა და ტექნოლოგიური ინოვაციების სამყაროდან. სწორედ ამიტომ, ამ მიმართულებით პლატფორმის უნივერსიტეტთან თანამშრომლობა კიდევ ერთი, მნიშვნელოვანი და თანმიმდევრული ნაბიჯია.

"საგანმანათლებლო კონტენტი ჩვენთვის ყოველთვის იყო პრიორიტეტული მიმართულება, განსაკუთრებით მეცნიერებისა და ტექნოლოგიების სფეროში. ჩვენმა პლატფორმამ, სხვადასხვა ციფრული არხის (Facebook, Instagram, TikTok, YouTube) თუ ვებგვერდის გავლით, წლების განმავლობაში შემოიკრიბა ამ თემატიკით დაინტერესებული აუდიტორია. მუდმივად ვცდილობთ, ჩვენს მკითხველებსა თუ მაყურებლებს ინოვაციური, გასაგები და სასარგებლო კონტენტი შევთავაზოთ. ამიტომაც, ჩვენთვის განსაკუთრებით მნიშვნელოვანია პარტნიორობა საქართველოს უნივერსიტეტთან, რომელსაც ძლიერი აკადემიური რესურსი და პრაქტიკულ ცოდნაზე ორიენტირებული ხედვა აქვს.

თანამედროვე სამყაროში ტექნოლოგიური ცოდნა ნებისმიერი ადამიანის ხელში სასიცოცხლოდ საჭირო იარაღია. გვიხარია, რომ ამ თანამშრომლობით შევძლებთ, კიდევ უფრო გავაძლიეროთ NEXT.On.ge-ის საგანმანათლებლო მიმართულება და შევქმნათ კონტენტი, რომლის გავლითაც ტექნოლოგიური თემები ფართო აუდიტორიისთვის უფრო გასაგები, საინტერესო და პრაქტიკულად გამოყენებადი გახდება.

მნიშვნელოვანია, რომ უნივერსიტეტი, ერთი მხრივ, გვიჭერს მხარს ამ მიმართულების განვითარებაში, ხოლო მეორე მხრივ აქტიურად იყენებს ჩვენს ტექნოლოგიურ თემატიკაზე ორიენტირებულ და მაღალი ჩართულობით გამორჩეულ პლატფორმას საკუთარი ექსპერტული ცოდნის, კვლევებისა და ხედვების გასაზიარებლად. გვჯერა, რომ ეს პარტნიორობა ხელს შეუწყობს არა მხოლოდ ინფორმაციის გავრცელებას, არამედ ტექნოლოგიური თემების მიმართ ინტერესის ზრდას და პროფესიული განვითარების შესაძლებლობების უკეთ გაცნობას საქართველოში", — ამბობს On.ge-ის აღმასრულებელი დირექტორი, ხატია თორდუა.