Devil Wears Prada 2 ბლოკბასტერად იქცა და დიდი აუდიტორიის ყურადღება მიიპყრო.

ვარსკვლავური შემადგენლობით დაკომპლექტებულმა ფილმმა მოლოდინს გადააჭარბა და პირველსავე კვირას ჩრდილოეთ ამერიკის 4 150 კინოთეატრში $77 მილიონი გამოიმუშავა. ეს შედეგი ბევრად აღემატება ორიგინალი ფილმის მაჩვენებელს, რომლის შემოსავალიც 2006 წელს სულ რაღაც $27.5 მილიონი იყო.

Devil Wears Prada 2-მა საერთაშორისო მასშტაბით კიდევ $156.6 მილიონი გამოიმუშავა, რამაც ფილმის გლობალური შემოსავალი პირველსავე კვირას ჯამში $233.6 მილიონამდე აიყვანა. ფილმმა 2026 წლის მსოფლიო პრემიერებს შორის მეორე საუკეთესო შედეგი აჩვენა. მან გაასწრო Michael-ს ($217 მილიონი) და მხოლოდ The Super Mario Galaxy Movie ($372.5 მილიონი) ჩამორჩა.

დისნეის 20th Century Studios-მა ფილმის მეორე ნაწილისთვის თანხა არ დაიშურა — ფილმის წარმოება, გლობალური მარკეტინგის ხარჯების გარეშე, დაახლოებით $100 მილიონი დაჯდა. შედარებისთვის, პირველი ნაწილის ბიუჯეტი (ინფლაციის გათვალისწინების გარეშე) დაახლოებით $40 მილიონი იყო. რეჟისორმა დევიდ ფრენკელმა New York Times-ს განუცხადა, რომ მეორე ნაწილის ბიუჯეტი "ძირითადად მსახიობების ჰონორარებზე" დაიხარჯა. როგორც ჩანს, დისნეის 20th Century Studios-ს ინვესტიცია უკვე ამართლებს. მეორე ნაწილი რამდენიმე კვირაში პირველი ფილმის მთლიან შემოსავალსაც კი გადააჭარბებს.

"ძალიან ცოტა კომედიურ დრამას შეუძლია ასეთი შედეგის ერთხელ ჩვენება, რომ აღარაფერი ვთქვათ მეორე, კიდევ უფრო წარმატებულ მცდელობაზე", — ამბობს დევიდ ა. გროსი, გამოცემა FranchiseRe-ის ანალიტიკოსი, — "მაყურებელს, რომელიც ძირითადად ქალებისგან შედგება, ეს ისტორია არასდროს ჰბეზრდება".

ფოტო: Luxury London

პირველი ფილმი ეფუძნებოდა ლორენ ვაისბერგერის 2003 წლის რომანს, რომელიც Vogue-ის რედაქტორის, ანა ვინტურის ასისტენტად მუშაობის რეალურ გამოცდილებაზეა დაფუძნებული. ფილმის მეორე ნაწილში, რომელზეც რეჟისორი დევიდ ფრენკელი და სცენარისტი ალინ ბროშ მაკკენა მუშაობდნენ, მოქმედება ორი ათწლეულის შემდეგ გრძელდება. ენ ჰეთეუეის პერსონაჟი, ენდი საქსი, Runway-ს ჟურნალში ბრუნდება, ამჯერად როგორც რედაქტორი, მირანდა პრისლის ხელმძღვანელობით. კრიტიკოსთა შეფასებები არაერთგვაროვანი იყო, თუმცა მაყურებელი ფილმს გაცილებით თბილად შეხვდა და CinemaScore-ის გამოკითხვებში ფილმმა A შეფასება მიიღო. PostTrak-ის მონაცემებით, პრემიერის კვირას მაყურებელთა თითქმის 75% ქალი იყო.

Devil Wears Prada 2-ის წარმატება დიდწილად განაპირობა ნოსტალგიამ და იმან, რომ 20 წლის შემდეგ თავიანთი საკულტო როლები კვლავ მერილ სტრიპმა, ენ ჰეთეუეიმ, ემილი ბლანტმა და სტენლი ტუჩიმ მოირგეს. პირველი ფილმი, რომელმაც მსოფლიო მასშტაბით $326 მილიონი გამოიმუშავა, კომერციულ წარმატებასთან ერთად, სხვადასხვა თაობის საკულტო კულტურულ მოვლენად იქცა. ეს დიდწილად განპირობებულია ისეთი ცნობილი, ხშირად ციტირებადი ფრაზებით, როგორებიცაა "Gird your loins!" და "By all means, move at a glacial pace", ასევე — მირანდას ცნობილი მონოლოგით ცისფერი სვიტრის შესახებ.

ფოტო: BBC

"წარმოდგენაც არ მქონდა, რომ ფილმის გამოსვლის დღიდან ჩემი რეპლიკები ცხოვრების ყოველ კვირას უნდა მომესმინა", — განუცხადა ბლანტმა Variety-ს, როდესაც Devil Wears Prada-ს 10 წელი შეუსრულდა.

რადგან Devil Wears Prada 2 იმ კვირას ერთადერთი დიდი პრემიერა იყო, სიის დანარჩენი ნაწილი ძველმა ფილმებმა დაიკავა.