"ხელი მოწერილია! ევროკავშირსა და სომხეთს შორის ურთიერთობები ახალ ეტაპზე გადადის" — ამის შესახებ ევროკომისიის პრეზიდენტი, ურსულა ფონ დერ ლაიენი სოციალურ პლატფორმა X-ზე წერს.

მისი თქმით, ბრიუსელსა და ერევანს შორის პარტნიორობა მნიშვნელოვნად გაღრმავდა და დღეს მხარეები თანამშრომლობის ახალ ეტაპზე გადადიან.

"ევროკავშირი და სომხეთი არასდროს ყოფილან ასე ახლოს. დღეს კი ჩვენი პარტნიორობა სრულიად ახალ ეტაპზე გადადის. გაუმარჯოს ევროკავშირსა და სომხეთს შორის მეგობრობას," — წერს ევროკომისიის პრეზიდენტი.

ამასთან, როგორც ფონ დერ ლაიენი აღნიშნავს, ევროკავშირ-სომხეთის დაკავშირებადობის პარტნიორობის დოკუმენტზე ხელი უკვე მოწერილია. მისი შეფასებით, აღნიშნული ინიციატივა სომხეთს აქცევს სტრატეგიულ ჰაბად, რომელიც დააკავშირებს ევროკავშირს, სამხრეთ კავკასიასა და ცენტრალურ აზიას.

"ხელმოწერილია ევროკავშირისა და სომხეთის დაკავშირებადობის პარტნიორობა.

ტრანსპორტიდან ენერგეტიკამდე და ციფრულ ქსელებამდე — ეს შეთანხმება სომხეთს აქცევს სტრატეგიულ ჰაბად კონტინენტების გადაკვეთის წერტილში.

ის დააკავშირებს ევროკავშირს, სამხრეთ კავკასიასა და ცენტრალურ აზიას," — აღნიშნულია განცხადებაში, რომელიც ევროკომისიის პრეზიდენტმა X-ზე გაავრცელა.

ცნობისთვის, მსოფლიო ლიდერები კვირას სომხეთში, ერევანში ევროპული პოლიტიკური გაერთიანების მე-8 სამიტზე დასასწრებად ჩავიდნენ. შეხვედრის დევიზია "მომავლის შენება: ერთიანობა და სტაბილურობა ევროპაში" იმართება.

48 ქვეყნის ლიდერი, მათ შორის ევროკავშირის 27 წევრი ქვეყნის წარმომადგენელი, 4 მაისს, შეიკრიბება, რათა მნიშვნელოვანი პოლიტიკური საკითხები განიხილონ.