"შეიქმნას სპეციალური სახელმწიფო ფონდი ბიუჯეტიდან მოპარული ფულის ბავშვთა დაავადებების სამკურნალოდ გამოსაყენებლად" — პარტიის კოალიცია ცვლილებებისთვის ერთ-ერთი ლიდერი, ელენე ხოშტარია, საქართველოს მეხუთე პრეზიდენტის, სალომე ზურაბიშვილის ინიციატივას ეხმიანება და აცხადებს, რომ მას სრულად იზიარებს. ამის შესახებ ინფორმაციას პარტიის ლიდერი სოციალურ ქსელში ავრცელებს.

ხოშტარიას თქმით, მნიშვნელოვანია დაიწყოს მსჯელობა ნაბიჯებზე, რომლებიც ხელისუფლების ცვლილების შემდეგ უნდა გადაიდგას, მათ შორის — რეაგირება დარღვევებზე.

სრულად ვიზიარებ პრეზიდენტ სალომე ზურაბიშვილის ინიციატივას, შეიქმნას სპეციალური სახელმწიფო ფონდი ბიუჯეტიდან მოპარული ფულის ბავშვთა დაავადებების სამკურნალოდ გამოსაყენებლად. ასევე ვიზიარებ მის სულისკვეთებასაც, რომ დავიწყოთ ფიქრი, რა გადაწყვეტილებებს მივიღებთ ამ არალეგიტიმური ხელისუფლების წასვლისა და მათ მიერ ჩადენილი სიბინძურეების ამოტივტივების შემდეგ," — წერს ხოშტარია.

ცნობისთვის, ზურაბიშვილის ინიციატივა, რომელიც "ქართული ქარტიის" განახლებას უკავშირდება, რამდენიმე მნიშვნელოვან მიმართულებას მოიცავს.

მათ შორისაა სპეციალური სახელმწიფო ფონდის შექმნა, სადაც კორუფციისა და მანკიერი ტენდერების გზით მითვისებული თანხები გადაირიცხება დიუშენის კუნთოვანი დისტროფიით დაავადებული ბავშვების მედიკამენტებისთვის.

"ქართულ ქარტიას განახლება შეიძლება სჭირდებოდეს, თუმცა ჯერ არავის წარმოუდგენია კონკრეტული წინადადება, არც არავის უკან წაუღია ხელმოწერა. რჩება ამ ეტაპზე მაინც როგორც მაკონსოლიდირებელი დოკუმენტი, სამოქმედო გეგმა, რომელმაც უნდა განსაზღვროს ამათ ჩამოსვლის/ წინააღმდეგობის ფრონტის გამარჯვებისას პირველადი საერთო სამოქმედო გეგმა.

მე მინდა ყველა ხელმომწერს შევთავაზო ორი მნიშვნელოვანი ცვლილება თუ დამატება:
— პირველ ორ პრიორიტეტთან ერთად ( სინდისის და პოლიტპატიმრების დაუყონებლივ განთავისუფლება, ყველა ანტიევროპულ და ანტიქართულ კანონის გაუქმება) მესამეც ჩაეწეროს დაუყონებლივ დუშენის დაავადებულ ბავშვების მედიკამენტები ბიუჯეტიდან დაფინანსდეს!

— და მეორე შეიქმნას სახელმწიფო სპეციალური ფონდი სადაც ჩაირიცხება კორუპციით, მანკიერ ტენდერებით და სხვა ფორმით ბიუჯეტიდან მოპარული თანხები და პრუორიტეტად ამ თანხებს განესაზღვრება საქართველოში ბავშვთა სახელმწიფო ონკოლოგიური ცენტრისა და ასევე ყველა შესაძლო ბავშთა დაავადებების სამკურნალო ხარჯების დაფინანსება.

ანუ ჩვენ მომავალ თაობის ჯანსაღ სიცოცხლეს უნდა მიეძღვნას ამდენი თაღლითის და კორუმპირებული პოლიტიკოსისგან მოპარული თანხები!

იმედი მაქვს ეს საკითხი ყველასათვის მისაღები იქნება და ერთიანობას გაამყარებს კიდევაც!" — განაცხადა ზურაბიშვილმა სოციალურ ქსელში.