"კიდევ ერთხელ ადასტურებს ევროპარლამენტი, რომ დღითიდღე თავს იმკვიდრებს როგორც საბჭოთა კავშირის საკავშირო სახალხო დეპუტატთა ყრილობის მემკვიდრე," — შალვა პაპუაშვილი ევროპარლამენტის მიერ საქართველოს შესახებ მიღებულ რეზოლუციას გამოეხმაურა და მას "ქართველი ხალხის მიმართ მტრული" უწოდა.

მისი შეფასებით, ბრიუსელში მიღებული გადაწყვეტილებები ჰგავს იმგვარ გადაწყვეტილებებს, რომლებიც საბჭოთა პერიოდში მოსკოვში საქართველოს მიმართ მიიღებოდა.

"რაც შეეხება, ქართველი ხალხის მიმართ მორიგ მტრულ ანგარიშს თუ რეზოლუციას, რომელიც მზადდება, ამაში ახალი არაფერი არ არის. კიდევ ერთხელ ადასტურებს ევროპარლამენტი, რომ დღითიდღე თავს იმკვიდრებს როგორც საბჭოთა კავშირის საკავშირო სახალხო დეპუტატთა ყრილობის მემკვიდრე. თავს აჩენს როგორც მემკვიდრე საბჭოთა კავშირის სახალხო ყრილობისა, რაც გასაკვირი არ არის იმის გათვალისწინებით, რომ ვხედავთ ისევ საბჭოთა მოქალაქეებს ევროპარლამენტის რიგებში, საბჭოთა ნომენკლატურის თუ ელიტის წარმომადგენლებს, რომლებიც დღეს ევროპარლამენტში არიან მოკალათებული. ვგულისხმობ ბალტიის ქვეყნების და აღმოსავლეთ ევროპის ზოგიერთი ქვეყნის წარმომადგენელს.

როგორც მოსკოვის საკავშირო ყრილობა იღებდა მტრულ გადაწყვეტილებებს საქართველოსთან დაკავშირებით, ასევე ბრიუსელის საკავშირო პარლამენტი დღეს იღებს ამგვარ მტრულ გადაწყვეტილებებს საქართველოსთან დაკავშირებით.

მეორე, ამ რეზოლუციის ანგარიშის ავტორი გახლავთ ქალბატონი იუკნევიჩიანე, რომელიც გამოირჩევა ფაშისტური განცხადებებით ქართველი ხალხის მიმართ, რაც ნიშანდობლივია, რომ რამდენიმე დღეში ჩვენ გვექნება კიდევ ერთი აღნიშვნა ფაშიზმზე გამარჯვების დღისა და სიმბოლურია, რომ 9 მაისამდე რამდენიმე დღით ადრე ადამიანი, ქალბატონი იუკნევიჩიანე, რომელიც გამოირჩევა ფაშისტური განცხადებებით ქართველი ხალხის მიმართ არის ამ რეზოლუციის ავტორი.

შეგახსნებთ, რომ მას ეკუთვნის განცხადებები, რომ ქართული ოცნება ეს არის ინფექცია, რაც არის ფაშისტური ნარატივი, სხვათა დემონიზებისა და მათი ღირსების შემლახველი ანუ ღირსების წინააღმდეგ მიმართული ქცევისთვის. მან ასევე განაცხადა, რომ საქართველოში დამნაშავეები არიან ქართული ოცნების ამომრჩევლები, რითაც კოლექტიური პასუხისმგებლობა წარმოიდგინა, რაც სწორედ ფაშისტური მიდგომა არის. ასე რომ, ესეც არ არის გასაკვირი," — განაცხადა პაპუაშვილმა.

ცნობისთვის, ევროპარლამენტის საგარეო საქმეთა კომიტეტმა (AFET) საქართველოსთან დაკავშირებით ახალი, მკაცრი ანგარიში დაამტკიცა. დოკუმენტს მხარი 53-მა ევროპარლამენტარმა დაუჭირა, 14 წინააღმდეგი იყო, ხოლო 2-მა თავი შეიკავა. ანგარიშში ხაზგასმულია, რომ კანდიდატ ქვეყანასთან ევროკავშირის შემდგომი ურთიერთობა მკაცრად უნდა იყოს დამოკიდებული იმაზე, შეცვლის თუ არა მთავრობა თავის ანტიდემოკრატიულ და ანტიევროპულ კურსს.

ანგარიშის მომხსენებელმა, ევროპარლამენტარმა რასა იუკნევიჩიანემ, ქვეყანაში არსებულ ვითარებას საგანგაშო უწოდა. მისი განცხადებით, ქართული ოცნების ხელისუფლება სისტემატურად ანგრევს დემოკრატიულ ინსტიტუტებს.