მთავრობის ახალი გადაწყვეტილებით, პირველი აპრილიდან სოციალურად დაუცველი და მრავალშვილიანი ოჯახებისთვის ელექტროენერგიის სუბსიდირების მოცულობა გაიზარდა. ცვლილების მთავარი მიზანია, ტარიფის კორექტირების მიუხედავად, ამ ჯგუფებისთვის გადასახადი უცვლელი დარჩეს და მათზე ფინანსური ტვირთი არ გაიზარდოს.

სოციალურად დაუცველი ოჯახებისთვის, რომელთა სარეიტინგო ქულა 70 000-ს არ აღემატება, სახელმწიფო დამატებით 5 თეთრს დაასუბსიდირებს. შედეგად, დახმარების ჯამური მოცულობა 1 კვტ-სთ-ზე აქამდე არსებული 3.5 თეთრის ნაცვლად 8.5 თეთრი გახდა. ეს შეღავათი ფარავს სხვაობას 2015 წლის ივლისსა და 2020 წლის დეკემბერში მოქმედ სამომხმარებლო ტარიფებს შორის. ანალოგიურად, 3.5-დან 8.5 თეთრამდე გაიზარდა სუბსიდია იმ ოჯახებისთვისაც, რომელთა სარეიტინგო ქულა 70 000-დან 150 000-მდეა (200 კვტ-სთ-ის ფარგლებში). აღსანიშნავია, რომ ეს კონკრეტული ცვლილება თბილისის გარდა მთელი ქვეყნის მასშტაბით მოქმედებს.

რაც შეეხება მრავალშვილიან ოჯახებს, მათ ეს ცვლილება მთელი საქართველოს მასშტაბით შეეეხოთ. ელექტროენერგიის ახალი ტარიფის შესაბამისად, ამ სტატუსის მქონე ოჯახები 20 ლარის ნაცვლად 30 ლარის ოდენობის სუბსიდიას მიიღებენ. ამასთანავე, ძალაში რჩება დამატებითი შეღავათიც — 10-ლარიანი სუბსიდია ყოველ მომდევნო შვილზე.

ხაზგასასმელია, რომ აღნიშნული ცვლილებები უკვე ამოქმედდა და ძალაშია მიმდინარე წლის პირველი აპრილიდან.