დმანისისა და აგარაკ-ტაშირის ეპისკოპოსი ზენონ იარაჯული მროველ-ურბნელი მიტროპოლიტის, იობის (აქიაშვილი) დიპლომის გაუჩინარების ამბავს სოციალურ ქსელში გამოეხმაურა. მისი თქმით, წმინდა სინოდმა, მცხეთის სასულიერო სემინარიის რექტორის წერილობითი მოწმობის საფუძველზე, დაადასტურა მეუფე იობის დიპლომის გაცემის ფაქტი. მისივე განმარტებით, სინოდის ეს გადაწყვეტილება "წარმოადგენს საკმარის და სრულ სამართლებრივ საფუძველს, ქმნის სრულ იურიდიულ ეფექტს, განამტკიცებს მის ლეგიტიმურობას და გამორიცხავს მისი არაღიარების შესაძლებლობას".

"მსურს განვმარტო, რომ საქართველოს სამოციქულო მართლმადიდებელი ავტოკეფალიური ეკლესიის მღვდელმთავართა კრებამ (წმინდა სინოდი),როგორც ეკლესიის უმაღლესმა საკანონმდებლო და აღმასრულებელმა ორგანომ, მცხეთის სასულიერო სემინარიის რექტორის (მიტროპოლიტი ზოსიმე) წერილობითი მოწმობის საფუძველზე დაადასტურა ურბნისისა და რუისის მიტროპოლიტის, ყოვლადსამღვდელო იობის შესაბამისი საღვთისმეტყველო განათლების დამადასტურებელი მოწმობის (დიპლომი) გაცემის ფაქტი.

შესაბამისად, აღნიშნული სინოდური გადაწყვეტილება წარმოადგენს საკმარის და სრულ სამართლებრივ საფუძველს, ქმნის სრულ იურიდიულ ეფექტს, განამტკიცებს მის ლეგიტიმურობას და გამორიცხავს მისი არაღიარების შესაძლებლობას.

აქვე აღვნიშნავ, რომ სინოდის გადაწყვეტილება ფლობს უმაღლეს იურიდიულ ძალას საეკლესიო სამართლებრივ იერარქიაში. სინოდური დადგენილება ან გადაწყვეტილება როგორც ეკლესიის უმაღლესი ორგანოს აქტი აღემატება ყველა ქვემდგომ ნორმატიულ და ინდივიდუალურ აქტს, მათ შორის ბრძანებებს", — დაწერა მეუფემ.

ცნობისთვის, მარნეულისა და ჰუჯაბის ეპისკოპოსმა, გიორგი ჯამდელიანმა "ტვ პირველთან" საუბრისას პატრიარქობის ერთ-ერთი კანდიდატის, მეუფე იობის დიპლომის გაუჩინარების შესახებ განაცხადა. მისი ვარაუდით, დოკუმენტი, შესაძლოა, მოპარული იყოს.

შეგახსენებთ, რომ 28 აპრილს გამართულ სინოდის სხდომაზე პატრიარქობის სამი კანდიდატი დასახელდა. ფარული კენჭისყრის შედეგად ხმები შემდეგნაირად გადანაწილდა:

  • მეუფე შიო (მუჯირი): 20 ხმა;
  • მეუფე იობი (აქიაშვილი): 7 ხმა;
  • მეუფე გრიგოლი (ბერბიჭაშვილი): 7 ხმა.