სტუდენტური მოძრაობა თავისუფლებისთვის ლიდერი, აქტივისტი ნიკო მანაგაძე ჟურნალისტურ საქმიანობაში ხელის შეშლის საქმეზე სპეციალურ საგამოძიებო სამსახურში გამოკითხეს. უწყების დატოვების შემდეგ, მანაგაძემ მედიასთან კომენტარი გააკეთა.

"[იმედის ჟურნალისტს] იქ ხელს არავინ უშლიდა და არც გადაადგილების თავისუფლება ეზღუდებოდა [...] მე ტროტუარზე ვიყავი და თქვენი კოლეგა გადაადგილდებოდა იმ მიმართულებით, საითაც ვიდექი [...] რაც შეეხება ჩემსა და იმედის ჟურნალისტს შორის დიალოგს - არავითარ ხელშეშლას ადგილი არ ჰქონია. მით უმეტეს, ის იმ მომენტშიც ჩართვაზეც არ იდგა", – უთხრა მანაგაძემ ჟურნალისტებს გამოკითხვიდან გამოსვლის შემდეგ.

TV იმედის მიმართვის საფუძველზე, ჟურნალისტურ საქმიანობაში ხელის შეშლისთვის, ნიკო მანაგაძის წინააღმდეგ სისხლის სამართლის საქმე აღიძრა.

20 ნოემბერს, სპეციალურმა საგამოძიებო სამსახურმა განცხადება გაავრცელა, სადაც ნათქვამია, რომ უწყებამ 18-19 ნოემბერს ჭავჭავაძისა და მელიქიშვილის გამზირებზე მიმდინარე აქციის დროს, სხვადასხვა არხის თანამშრომლებისთვის ჟურნალისტურ საქმიანობაში უკანონოდ ხელის შეშლის ფაქტებზე გამოძიება დაიწყო.