14 ნოემბერს ახალი ზელანდიის პარლამენის სხდომაზე ვაითანგის (Waitangi) ხელშეკრულებაში შესწორებების შეტანა განიხილებოდა. ხელშეკრულება 1840 წელს დაიდო და ბრიტანეთის სამეფო ოჯახისა და მაორის ბელადების ურთიერთობას განსაზღვრავს. ამჟამად მოქმედი პრინციპები, პარტნიორობასა და სამართალზე ხელშეკრულებაში კონკრეტულად არ არის განსაზღვრული. წლების განმავლობაში უფლებებს სასამართლოს დახმარებითა და მთავრობის პოლიტიკით ადგენდნენ.

ახალი კანონპროექტი ამ საკითხების დაკონკრეტებასა და ხელშეკრულებაში ჩაწერას გულისხმობს. მაორის მოსახლეობა თვლის, რომ ეს ცვლილებები შეასუსტებს მათ უფლებებს და ვაითანგის(Waitangi) ხელშეკრულების ძირითად პრინციპებს დაარღვევს, რამაც შესაძლოა სამართლებრივი და სოციალური გაურკვევლობა გამოიწვიოს. საზოგადოების დიდი ნაწილი ხელშეკრულების გადახედვას ძირითადი უფლებების შეზღუდვად მიიჩნევენ.

პროტესტის ნიშნად მაორის დეპუტატებმა სხდომაზე ჰაკა შეასრულეს და კანონპროექტის წინააღმდეგ თავიანთი პოზიცია მკაფიოდ გამოხატეს. მათ დარბაზში მისული ხალხიც აჰყვა, რაც საბოლოოდ სხდომის გადადებით დასრულდა.

ცნობისთვის, ჰაკა მაორების ტრადიციული საბრძოლო ცეკვაა. თანამედროვე სამყაროში ჰაკას კულტურული მნიშვნელობა აქვს. ის მაორის იდენტობისა და მემკვიდრეობის სიმბოლოა და ძირითადად სპორტულ მატჩებზე ან სოციალური და პოლიტიკური პროტესტის დროს სრულდება. სწორედ ისე, როგორც ეს ახალ ზელანდიის პარლამენტში მიმდინარე სადაო კანონპროექტის განხილვის დროს მოხდა.