წიგნის 19 გამომცემლობა ერთობლივ განცხადებას აქვეყნებს და აცხადებს, რომ "წიგნის გამომცემელთა და გამავრცელებელთა ასოციაციის" მიერ რუსული კანონის რეესტრში რეგისტრაცია მათთან შეუთანხმებელი იყო, რის გამოც ტოვებენ ასოციაციას.

მათი თქმით, რუსული კანონის რეესტრში დარეგისტრირება მათთვის პრინციპულად მიუღებელია და გადაწყვეტილება მას შემდეგ მიიღეს, რაც რამდენიმეთვიანი ძალისხმევის მიუხედავად თავმჯდომარესთან, თამარ ლებანიძესთან, და დირექტორთან, დალი ბაგრატიონ-გრუზინსკისთან, "კონსტრუქციული დიალოგი ვერ მოხერხდა".

"2024 წლის 29 აგვისტოს საქართველოს წიგნის გამომცემელთა და გამავრცელებელთა ასოციაციის გამგეობამ მიიღო გადაწყვეტილება ასოციაციის უცხოური ძალის ინტერესების გამტარებელ ორგანიზაციად რეგისტრირების შესახებ. ეს გადაწყვეტილება გამგეობამ, მისმა თავმჯდომარემ, თამარ ლებანიძემ და ასოციაციის დირექტორმა, დალი ბაგრატიონ-გრუზინსკიმ მიიღეს ასოციაციის წევრებთან შეუთანხმებლად.

დარეგისტრირება ჩვენთვის პრინციპულად მიუღებელია, ასეთი სტრატეგიული მნიშვნელობის საკითხის ამ ფორმით გადაწყვეტა კი მმართველობის ის ფორმაა, რომელიც დაუშვებელია წევრობაზე დაფუძნებულ ორგანიზაციაში. სამწუხაროდ, წესდებაში არსებული ხარვეზების გამო ვერ შევძელით ქმედითი ზომების მიღება ასოციაციის შიგნით, ხოლო რამდენიმეთვიანი ძალისხმევის მიუხედავად თავმჯდომარესთან, თამარ ლებანიძესთან, და დირექტორთან, დალი ბაგრატიონ-გრუზინსკისთან, კონსტრუქციული დიალოგი ვერ მოხერხდა.

ვინაიდან ასოციაციის მმართველი რგოლი აღარ ითვალისწინებს წევრების ინტერესები და უჩვენოდ იღებს ჩვენთვის დამაზიანებელ გადაწყვეტილებებს, აღარ გვსურს ვიყოთ ამ ორგანიზაციის წევრები. ამიტომ ვიღებთ ჩვენთვის უმძიმეს გადაწყვეტილებას და ვტოვებთ ასოციაციას, რომელსაც ბევრი ჩვენგანი მრავალი წლის განმავლობაში ერთგულად ემსახურა.

ბევრს შეიძლება გახსოვთ, რომ მაისის ფესტივალის დროს სწორედ ამ სცენიდან გამოვთქვით პროტესტი რუსული კანონის წინააღმდეგ. ახლა საქმითაც ვადასტურებთ, რომ ეს და სიტყვის თავისუფლების შემზღუდავი სხვა კანონები ჩვენთვის არის სრულიად მიუღებელი.

ჩვენ არც გაყალბებულ არჩევნებს ვაღიარებთ და ერთად გავაგრძელებთ ჩვენი ქვეყნის ევროპული მომავლისთვის ბრძოლას. საქართველოს გამომცემლებისათვის ყოველთვის მთავარი ღირებულება იყო და იქნება თავისუფალი სიტყვა და მომავალშიც მხარდამხარ დავდგებით ქვეყანაში გამოხატვის თავისუფლების დასაცავად და წიგნიერების გასაზრდელად". - ნათქვამია განცხადებაში.

განცხადებას ხელს აწერენ:

1. პალიტრა L;

2. ბიბლუსი;

3. ინტელექტი;

4. არტანუჯი;

5. ინდიგო;

6. ზიარი;

7. ზებრა;

8. მედუზა;

9. პეგასი;

10. ბუქმანია;

11. ბუქმარკი – წიგნები ვაკეში;

12. საბა;

13. ალონი;

14. წიგნის მაღაზია "შაქრო ბაბუა";

15. ლაზარე;

16. რასთი კომიქს;

17. ელვა.ჯი;

18. ელვა იმპორტი;

19. კავკასია.

როგორც სოციალურ ქსელში "ბაკურ სულაკაურის გამომცემლობამ" დაწერა, სულაკაურის გამომცემლობამ "წიგნის გამომცემელთა და გამავრცელებელთა ასოციაცია" 2014 წელს დატოვა. ამას გარდა, 3 წელია დატოვებული აქვს ასოციაცია გამომცემლობას "წიგნებში ბათუმში".