მოლდოვაში ჩატარებული არჩევნების შესახებ საქართველოს პრემიერის ირაკლი კობახიძის მიერ გაკეთებული განცხადების გამო მოლდოვის საგარეო საქმეთა სამინისტროში გამოიძახეს საქართველოს ელჩის საქმეთა დროებითი რწმუნებული

საქართველოს ელჩის საქმეთა დროებით რწმუნებული მოლდოვის საგარეო საქმეთა სამინისტროში იმის შემდეგ გამოიძახეს, რაც საქართველოს პრემიერმინისტრმა, ირაკლი კობახიძემ, მოლდოვაში ჩატარებული არჩევნების შესახებ განცხადება გააკეთა.

ამის შესახებ ინფორმაციას მოლდოვის საგარეო საქმეთა სამინისტრო, საკუთარ ვებსაიტზე აქვეყნებს.

"მოლდოვა ღრმა უკმაყოფილებას გამოთქვამს საქართველოს პრემიერ-მინისტრის მიერ მოლდოვის რესპუბლიკის ევროპული ინტეგრაციისა და ჩვენს ქვეყანაში მიმდინარე საარჩევნო პროცესის დამახინჯებული და შეუსაბამო განხილვის გამო", — წერია განცხადებაში.

ცნობისთვის, ირაკლი კობახიძემ მოლდოვაში ჩატარებული საპრეზიდენტო არჩევნების შესახებ ბუდაპეშტში, ევროპის პოლიტიკური გაერთიანების სამიტზე ჟურნალისტებთან ისაუბრა.

"თუ სადმე იყო პრობლემები არჩევნებზე, ეს იყო მოლდოვა. თქვენ იცით, როგორ ჩატარდა არჩევნები. ქვეყანაში როცა აგებ არჩევნებს, მერე თამამად აღარ უნდა ისაუბრო, იგივეა, როცა აგებ რეფერენდუმს, თან 45 პროცენტი აიღო მხოლოდ რეფერენდუმზე. პრობლემა არის ორმაგი სტანდარტი და უსამართლობა. მოლდოვა არის ქვეყანა, სადაც უშუალოდ მოლდოვის მოსახლეობის მხოლოდ 45 პროცენტი უჭერს მხარს ევროკავშირში ინტეგრაციას", — განაცხადა კობახიძემ.