თბილისის საქალაქო სასამართლომ ჭონქაძის ქუჩაზე მომხდარ მკვლელობაში ბრალდებულს აღკვეთის ღონისძიების სახედ პატიმრობა შეუფარდა.

სასამართლომ მხარეთა განმარტებების მოსმენის, წარმოდგენილი მასალების, შუამდგომლობის დასაბუთებულობის შესწავლის შედეგად მიიჩნია, რომ ბრალდებულის მხრიდან მიმალვის, ახალი დანაშაულის ჩადენისა და საქმისთვის მნიშვნელოვანი ინფორმაციის მოპოვებისათვის ხელშეშლის საფრთხეები არსებობდა.

საქმე ეხება, 2017 წლის 16 აგვისტოს, ქ. თბილისში ჭონქაძის ქუჩაზე მომხდარ მკვლელობას. ბრალდების მხარის ვერსიით, ბრალდებულმა შურისძიების მოტივით, მსხვერპლს ცეცხლსასროლი იარაღიდან ზურგში სიცოცხლისათვის შეუთავსებელი დაზიანებები მიაყენა და ადგილიდან მიიმალა.

მოცემულ საქმეზე წინასასამართლო სხდომა 2017 წლის 5 ოქტომბერს 12:00 გაიმართება.