ადამიანის უფლებათა ევროპულმა სასამართლომ ყოფილი მოსამართლის, მაია ბაქრაძის საქმეზე გამოხატვისა და გაერთიანების თავისუფლების დარღვევა დისკრიმინაციასთან ერთობლიობაში დაადგინა. ამის შესახებ ინფორმაციას სოციალური სამართლიანობის ცენტრი ავრცელებს.

სასამართლოს დადგენილებით, ბაქრაძის მიმართ დაირღვა ადამიანის უფლებათა ევროპული კონვენციის მე-10 (გამოხატვის თავისუფლების მუხლი) მე-14 (დისკრიმინაციის აკრძალვის მუხლი) და მე-11 (გაერთიანების თავისუფლება) მუხლებთან მიმართებაში და მორალური ზარალის ანაზღაურებისთვის, სასამართლომ საქართველოს სახელმწიფოს 4500 ევროს გადახდა დააკისრა.

საქმეს სოციალური სამართლიანობის ცენტრი აწარმოებდა. მათ ევროპის ადამიანის უფლებათა სასამართლოში წარუდგინეს განცხადება, რომელშიც მითითებული იყო, რომ მაია ბაქრაძე იუსტიციის საბჭოს მხრიდან, მისი და მოსამართლეთა ერთობის კრიტიკული მოსაზრებების გამო, განსხვავებული მოპყრობის მსხვერპლი გახდა. განცხადებაში ნახსენებია, რომ მსგავსი მოპყრობა წარმოადგენს ადამიანის უფლებათა ევროპული კონვენციის მე-14 მუხლის დარღვევას მე-8, მე-10 და მე-11 მუხლებთან ერთობლიობაში.

ამასთან, ბაქრაძე 2013 წელს სასამართლო რეფორმის მხარდასაჭერად შექმნილ მოსამართლეთა დამფუძნებელი წევრი იყო. იგი ორგანიზაციის წევრებთან ერთად საჯარო გამოსვლებში ხშირად საუბრობდა კანონმდებლობაში არსებულ ხარვეზებზე და ამასთან, აკრიტიკებდნენ იუსტიციის უმაღლეს საბჭოს დაუსაბუთებელ და გაუმჭვირვალ გადაწყვეტილებებს.

ადამიანის უფლებათა ევროპული სასამართლოს გადაწყვეტილებას სოციალურ ქსელში სამართლიანობის ცენტრის იურისტი, გურო იმნაძე გამოეხმაურა.

იმნაძის თქმით, "ეს გადაწყვეტილება უდიდესი რეპუტაციული დარტყმაა კლანური სასამართლოსთვის და მთელი ამ წლების განმავლობაში მიმდინარე დანიშვნა/დაწინაურებების პროცესისთვის", — წერს ის.

ამასთან, მან თქვა რომ ამ თემის დეტალურად განხილვა დღეს, 15:00 საათზე ჩანიშნულ პრესკონფერენციაზე მოხდება.