თბილისის სააპელაციო სასამართლოში 26 ოქტომბრის არჩევნებზე ფარულობის უფლების დარღვევასთან დაკავშირებით პროცესი გრძელდება. განხილვა 6 ოქტომბერს დაიწყო და უკვე, დაახლოებით, 22 საათია გრძელდება. სასამართლო უარს აცხადებს პროცესის გადადებაზე და მხოლოდ 30-წუთიანი შესვენებებით შემოიფარგლება. ინფორმაციას სასამართლო განხილვიდან პერიოდულად საქართველოს ახალგაზრდა იურისტთა ასოციაციის ხელმძღვანელი, ნონა ქურდოვანიძე ავრცელებს.

"სხდომის დასაწყისში, ცენტრალური საარჩევნო კომისიის იურისტებმა თეთრიწყაროში საიას მიერ მოგებული საქმის გაბათილების მიზნით პროცედურების დარღვევით დააყენეს საკითხი, რომ თეთრიწყაროს მოსამართლე არ იყო უფლებამოსილი განეხილა ეს საქმე, რადგან მისი ცოლი Facebook-ზე კრიტიკულ პოსტებს წერს. ცოლის მიერ გაკეთებული განცხადებები არ შეიძლება მოსამართლის აცილების საფუძველი იყოს. გარდა შინაარსობრივი დაუსაბუთებლობისა, პროცედურულადაც არასწორია ამ საკითხის სააპელაციო სასამართლოში დაყენება, რადგან მათ მოსამართლის აცილება პირველი ინსტანციის სასამართლოში არ დაუყენებია", — წერდა ნონა ქურდოვანიძე.

პარალელურად, ქუთაისის სააპელაციო სასამართლომ არასამთავრობო ორგანიზაციების ანალოგიური სარჩელები არ დააკმაყოფილა.

ასევე, თბილისის სააპელაციო სასამართლომ გააერთიანა საიას 12 საქმე 40-მდე ოლქის წინააღმდეგ და კოალიცია ჩემი ხმის საქმეები. ნონა ქურდოვანიძის თქმით, პროცესის დაწყებისას საქმეების გამიჯვნა მოითხოვეს, რადგან ამ მოცულობის საქმეების ერთ საქმედ გაერთიანება არ იყო გონივრული და სამართლიანი სასამართლოს უფლების დარღვევას გამოიწვევდა, თუმცა მოსამართლე დიმიტრი გვრიტიშვილმა მოთხოვნა არ დააკმაყოფილა და უპასუხა, რომ რადგან სააპელაციო სასამართლო საარჩევნო დავების განმხილველი ბოლო ინსტანციაა, არ იქნებოდა სწორი, ერთგვაროვან მოთხოვნებზე სხვადასხვა მოსამართლეს მიეღო გადაწყვეტილება.

ცნობისთვის, გვრიტიშვილს არასამთავრობო ორგანიზაციები "მოსამართლეთა კლანის" წევრად მოიხსენიებენ. ის კატეგორიულად ეწინააღმდეგება "ვეტინგს", რომელიც ევროკომისიის რეკომენდაციაა და მოსამართლეთა კეთილსინდისიერების გადამოწმებას გულისხმობს.

ნონა ქურდოვანიძემ ბოლო პოსტი დილით, 10:51 საათზე გაავრცელა. მისი თქმით, პროცესი ჯერ კიდევ გრძელდება და მისი ხანგრძლივობა გამოიწვია იმან, რომ სასამართლო 26 საქმეს ერთად განიხილავს.