ისრაელის პრემიერმინისტრის, ბენიამინ ნეთანიაჰუს ყოფილი პრესმდივანი, საიდუმლო დოკუმენტების ჟურნალისტებისთვის გადაცემის ბრალდებით დააკავეს.

გერმანიის რადიო სასამართლო უწყებაზე დაყრდნობით იუწყება, რომ მასთან ერთად დაპატიმრებულია კიდევ სამი პირი, მათ შორის უშიშროების სამსახურის წარმომადგენელი.

სექტემბერში, ისრაელის საშინაო საიდუმლო სამსახურმა "შინ ბეტმა" და არმიამ, მას შემდეგ დაიწყეს გამოძიება, რაც გერმანიის გაზეთმა "Bild"-მა და ბრიტანეთის გამოცემამ "The Jewish Chronicle"-მა საიდუმლო სამხედრო დოკუმენტების შესახებ ინფორმაცია გაავრცელეს.

ინფორმაცია ეხებოდა ჰამასის (აშშ-სა და ევროკავშირში ტერორისტულ დაჯგუფებად აღიარებული) მიერ ღაზაში დაკავებული მძევლების გათავისუფლების მცდელობას. ქალაქ რიშონ-ლე-ციონის სასამართლო აცხადებს, ამ მასალების გამოქვეყნებას შეიძლება მძევლების განთავისუფლებისთვის ხელი შეეშალა.

ოპოზიციის ხელმძღვანელი, იაირ ლაპიდი ამტკიცებს, რომ დანაშაული სათავეს იღებს პრემიერის ოფისში და უნდა გაირკვეს, ნეთანიაჰუმ მასალების გავრცელების შესახებ იცოდა თუ არა.

ამასთან, Deutschlandfunk-ი წერს, რომ ისრაელის პრემიერმინისტრ ბენიამინ ნეთანიაჰუს ოპონენტები ბრალად სდებენ, რომ იგი ომს აჭიანურებს ღაზის სექტორში, რადა თავისი მემარჯვენე ექსტრემისტი კოალიციური პარტნიორები დააკმაყოფილოს.