Bloomberg-ის ცნობით, თურქეთში ე.წ. უცხოური გავლენის აგენტების კანონის მიღებას იგეგმება.

კანონპროექტი, რომელსაც თურქეთის პარლამენტში მომავალ დღეებში განიხილავენ, Bloomberg-ის ცნობით, ისეთი სუბიექტების შეზღუდვას ისახავს მიზნად, რომლებიც "სახელმწიფო უსაფრთხოებისა და მისი საშინაო თუ საგარეო პოლიტიკური ინტერესების წინააღმდეგ მოქმედებენ". კანონპროექტი "აგენტობაში" ბრალდებული პიროვნებისათვის სასჯელის ზომად თავისუფლების 7 წლით აღკვეთასაც შეიძლება ითვალისწინებდეს.

"გადაწყვეტილება იმ უფრო ვრცელი საკანონმდებლო პაკეტის ნაწილია, რომელიც პრეზიდენტი რეჯეფ თაიფ ერდოღანის პარტიამ დააინიცირა. ის მსგავსია საქართველოში ახლახან მიღებული კანონისა, რამაც დასავლური სახელმწიფოების კრიტიკა და ქვეყანაში მასობრივი პროტესტების დაწყება გამოიწვია", — ვკითხულობთ Bloomberg-ის სტატიაში.

თურქმა სასამართლო ექსპერტებმა და ჟურნალისტებმა შეშფოთება გამოხატეს კანონის ბუნდოვან შინაარსთან დაკავშირებით. მათი თქმით, კანონის ბუნდოვანება შესაძლოა, მთავრობისადმი ნებისმიერი კრიტიკის ჩასახშობად იქნეს გამოყენებული.

ოპოზიციური რესპუბლიკელ ხალხთა პარტიის წევრის, ინან აკგუნ ალპის აზრით, კანონი ნიადაგს მოამზადებს ქვეყანაში მაქსიმალურად რეპრესიული გარემოს შესაქმნელად.