2024 წლის რეფერენდუმად შეფასებული საპარლამენტო არჩევნების წინ, მთავრობამ ცესკოს შენობა (სხვა ადმინისტრაციულ შენობებთან ერთად) სტრატეგიული ობიექტების ნუსხაში შეიტანა.

საქართველოს მთავრობის №361 დადგენილებას ხელს აწერს საქართველოს პრემიერმინისტრი ირაკლი კობახიძე.

მთავრობის დადგენილებაში წერია, რომ სტრატეგიული ან/და განსაკუთრებული მნიშვნელობის ობიექტების ნუსხა სისხლის სამართლის კოდექსის 222-ე მუხლის ან/და 330-ე მუხლის მიზნებისთვის დამტკიცდა.

222-ე მუხლი სტრატეგიული ობიექტის ხელში ჩაგდებას ან ბლოკირებას გულისხმობს და 2 წლამდე თავისუფლების აღკვეთას ითვალისწინებს. იგივე ქმედების ჯგუფურად ჩადენა კი 2-დან 4 წლამდე პატიმრობით ისჯება.

330-ე მუხლის მიხედვით კი, ტერორისტული მიზნით სტრატეგიული ობიექტის ხელში ჩაგდება ან ბლოკირება 10-დან 15 წლამდე პატიმრობას ითვალისწინებს.

ცესკოს შენობის გარდა, მთავრობის დადგენილებით, სტრატეგიული მნიშვნელობის ობიექტებს შორის მოხვდა:

საქართველოს უმაღლესი წარმომადგენლობითი ორგანოს ან/და აღმასრულებელი ხელისუფლების ორგანოების/დაწესებულებების, აგრეთვე ავტონომიური რესპუბლიკების უმაღლესი წარმომადგენლობითი ან/და აღმასრულებელი ორგანოების ადმინისტრაციული შენობები;
საქართველოს პრეზიდენტის ადმინისტრაციის ადმინისტრაციული შენობა;
საქართველოს მთავრობის ადმინისტრაციის ადმინისტრაციული შენობა;
საქართველოს საკონსტიტუციო სასამართლოსა და საერთო სასამართლოების ადმინისტრაციული შენობები;
საქართველოს იუსტიციის უმაღლესი საბჭოს ადმინისტრაციული შენობა;
მუნიციპალიტეტის საკრებულოს ან/და მერიის ადმინისტრაციული შენობები;
საქართველოს პროკურატურის სისტემის ადმინისტრაციული შენობები;
ეროვნული უსაფრთხოების საბჭოს აპარატის ადმინისტრაციული შენობა;
საქართველოს სახელმწიფო უსაფრთხოების სამსახურის ადმინისტრაციული შენობა;
საქართველოს დაზვერვის სამსახურის ადმინისტრაციული შენობა;
საქართველოს ეროვნული ბანკის ადმინისტრაციული შენობა;
საელჩოები და საკონსულო დაწესებულებები;
საქართველოს ცენტრალური საარჩევნო კომისიის ადმინისტრაციული შენობა;
საქართველოს საპატრიარქო;

(სია არასრულია)