სასამართლომ ერთიანობა - ნაციონალური მოძრაობის რეკლამის განუთავსებლობისთვის იმედი, POSTV და მაესტრო 5-5 ათასი ლარით დააჯარიმა და ვიდეორგოლის ეთერში განთავსება დაავალა, — ინფორმაციას მედიაჩეკერი ავრცელებს.

კომისიამ ტელეკომპანიებს სამართალდარღვევის ოქმები გუშინ შეუდგინა. ComCom-მა პოსტვ დამატებით სამართალდამრღვევად სცნო საზოგადოებრივი აზრის გამოკითხვის შედეგების კანონდარღვევით გავრცელებისთვის.

ComCom-ის განცხადების მიხედვით, კომუნიკაციების კომისიაში პოლიტიკური გაერთიანება ერთიანობა - ნაციონალური მოძრაობის საჩივარი შევიდა, რომლის თანახმადაც, 10 ოქტომბრიდან ტელეიმედის, პოსტვ-ისა და სტუდია მაესტროს ეთერში მათი უფასო პოლიტიკური წინასაარჩევნო რეკლამები აღარ გადის. ვიდეორგოლები 10 ოქტომბრამდე სამივე ტელევიზიის ეთერში გადიოდა.

10 ოქტომბერს იმედმა გამოაქვეყნა განცხადება, რომ სანამ მთავარი, TV პირველი და ფორმულა ქართული ოცნების ვიდეოებს ეთერში არ გაუშვებს, "კოლექტიური ნაცმოძრაობის" რეკლამებს ისიც აღარ განათავსებს. იმედის გადაწყვეტილება გაიზიარა პოსტვ-მაც.

როგორც ComCom წერს, განცხადება არ გაუვრცელებია „სტუდია მაესტროს“, თუმცა, იმავე პერიოდიდან ერთიანობა - ნაციონალური მოძრაობის ვიდეორგოლი მის ეთერშიც აღარ გადის.

გარდა ამისა, კომუნიკაციების კომისიის განცხადებით, პოსტვ-იმ, 9 ოქტომბერს, საზოგადოებრივი აზრის გამოკითხვის შედეგების შესახებ ინფორმაციის გავრცელებისას, არ მიუთითა გამოკითხვის დამკვეთი და ამასთან, არ იყო დაკონკრეტებული გამოკითხვა უფასო იყო თუ ფასიანი.

ComCom-ის მიერ შედგენილი ადმინისტრაციული სამართალდარღვევის ოქმები წინასაარჩევნო პერიოდში სასამართლოში იგზავნება და საბოლოო გადაწყვეტილებას სასამართლო შემჭიდროვებულ ვადაში (2 დღე) იღებს.