პაპუაშვილი X-ზე დალაი ლამას სიტყვებს იშველიებს და წერს, რომ "გამჭვირვალობის ნაკლებობა უნდობლობით სრულდება". მისი თქმით, სამოქალაქო საზოგადოების უდიდესი ნაწილი გამჭვირვალობის საკითხს პასუხისმგებლიანად მიუდგა და 156-მა ორგანიზაციამ უკვე დაასრულა იუსტიციის სამინისტროში უცხოური გავლენის გამტარებელ ორგანიზაციად რეგისტრაცია. მისივე თქმით, 300-ზე მეტი ორგანიზაცია რეგისტრაციის პროცესს ჯერ კიდევ გადის.

პაპუაშვილის ინფორმაციით, საქართველოში რეგისტრირებული 30 000 ორგანიზაციიდან 25 000 წლების განმავლობაში არააქტიური იყო, ხოლო აქტიურთაგან 600 იღებდა დაფინანსებას უცხოეთიდან, ხოლო მათგან 136 არ დარეგისტრირდა.

https://x.com/shpapuashvili/status/1847154090595570023?fbclid=IwY2xjawF_AOpleHRuA2FlbQIxMAABHRZyXpJKs-vzw0J5XAxtg76uztZ1gtgmN_4PvIdyCufoFR4EfG1i5p2g-Q_aem_yEeBvXRkB_ayFeINcKhzDw

მისი თქმით, ეს რაოდენობა უკვე აღემატება იმ 136 არასამთავრობო ორგანიზაციას, რომლებიც უცხოური გავლენის გამჭვირვალების კანონს აპროტესტებენ.

სექტემბერში ცნობილი იყო, რომ საქართველოში მოქმედი 31 233 ორგანიზაციიდან, რომლებიც დაფინანსებას უცხოური წყაროებიდან იღებს, საჯარო რეესტრს მხოლოდ 469-მ მიმართა. ეს კი არასამთავრობო ორგანიზაციების 1%-იც არ არის.

"როგორც მოსალოდნელი იყო და ახლა დანამდვილებით დავრწმუნდით, ქართული სამოქალაქო საზოგადოების დიდმა ნაწილმა პასუხისმგებლობიანი და საღი მიდგომა გამოამჟღავნა გამჭვირვალობის საკითხის მიმართ:

ამ დროისთვის, უცხოეთიდან დაფინანსებულმა 156 ორგანიზაციამ დაასრულა იუსტიციის სამინისტროს გამჭვირვალობის რეესტრში დარეგისტრირების პროცედურა. ეს რაოდენობა უკვე აღემატება იმ 136 არასამთავრობო ორგანიზაციას, რომლებიც უცხოური გავლენის გამჭვირვალობის კანონს აპროტესტებენ. მეტიც, კიდევ 300 ორგანიზაციის სარეგისტრაციო განაცხადი ამჟამად განხილვის პროცესშია.

ეს ყველაფერი მოხდა რამდენიმე პოლიტიკური არასამთავრობოსა და მათი დონორების მუქარის მიუხედავად, რომ ქართული სამოქალაქო საზოგადოება შეეწინააღმდეგებოდა მეტ გამჭვირვალობასა და ანგარიშვალდებულებას.

ცხადი გახდა ისიც, რომ 2023 წლის მარტში და 2024 წლის მაისში ქუჩაში ძალადობრივი პროტესტით გამოსული ჯგუფები სამოქალაქო საზოგადოებას კი არ წარმოადგენდნენ, არამედ რადიკალური პოლიტიკური პარტიების, მათი პოლიტიზებული არასამთავრობოებისა და პარტიული ტელევიზიების მიერ იყვნენ მობილიზებულნი.

ნამდვილმა სამოქალაქო საზოგადოებამ თავისი სიტყვა თქვა. საქართველოში რეგისტრირებული 30 000-ზე მეტი არაკომერციული ორგანიზაციიდან 25 000-მდე ორგანიზაცია, უკვე წლებია, უმოქმედოა. აქტიური ორგანიზაციებიდან, როგორც ჩანს, უცხოურ დაფინანსებას 600-მდე ორგანიზაცია იღებს და მხოლოდ 136 მათგანისთვის აღმოჩნდა მიუღებელი გამჭვირვალობა. ამგვარად, უცხოეთიდან დაფინანსებული არასამთავრობო ორგანიზაციების 75 პროცენტზე მეტისთვის გამჭვირვალობის კანონი პრობლემას არ წარმოადგენს.

და, ჰოი საოცრებავ, სამყაროს დაპირებული დასასრულის მიუხედავად, მზე კვლავ დანათის საქართველოს ულამაზეს სოფლებსა და ქალაქებს", – წერს პარლამენტის თავმჯდომარე