ილიას სახელმწიფო უნივერსიტეტი ავტორიზაციის საბჭოს გადაწყვეტილებას სააპელაციო კომისიაში გაასაჩივრებს. დღეს უნივერსიტეტში შეკრებილმა აკადემიურმა პერსონალმა ავტორიზაციის საკითხებთან დაკავშირებით სამოქმედო გეგმაზე ისაუბრა.

უნივერსიტეტის რექტორი, ნინო დობორჯგინიძე, დარწმუნებულია, რომ ავტორიზაციის საბჭო დამოუკიდებლად არ მოქმედებს და უნივერსიტეტის დასაცავად ყველა ადგილობრივ და საერთაშორისო მექანიზმის გამოყენებას აპირებს.

"ცოტა ხნის წინ გამოქვეყნდა თაიმსის შეფასება, რომელიც სრულიად დამოუკიდებლად აფასებს საერთაშორისო მასშტაბით და ამ კვლევაში 18 ათასზე მეტი უნივერსიტეტი იღებს მონაწილეობას. თითქმის იგივეა სტანდარტები, კვლევები, სასწავლო პროგრამები და იქ ქვეყნის მასშტაბით ვართ პირველები, ასევე რეგიონის მასშტაბითაც პირველები ვართ. დაახლოებით იმავე კრიტერიუმებით შეგვამოწმა საერთაშორისო ექსპერტთა ჯგუფმა, ასევე მოგვცა უმაღლესი შეფასება, შემდეგ გამოჩნდა ერთი მექანიზმი — საბჭო, რომელმაც ყოველგვარი დასაბუთების გარეშე ეს გადაწყვეტილებები შეცვალა. ეს, რა თქმა უნდა, აჩენს საფუძველს და ყველა დავრწმუნდით იმაში, რომ საბჭო არ მოქმედებდა დამოუკიდებლად. ეს არის ილიას უნივერსიტეტის, როგორც გამორჩეული ევროპული სივრცის დაზიანების მცდელობა და ჩვენ ამას ასე მარტივად არ დავთმობთ", — აცხადებს ნინო დობორჯგინიძე.

დადგება თუ არა ილიას სახელმწიფო უნივერსიტეტის არსებობა საფრთხის ქვეშ, პროფესორ გიგა ზედანიას აზრით, დამოკიდებულია იმაზე, რა პროცესები განვითარდება ქვეყანაში.

"ილიას უნივერსიტეტს არაფერი ემუქრება, თუ ამ ქვეყანაში ევროპული განვითარების პროექტი შენარჩუნდა, ხოლო თუ ევროპული განვითარების პროექტი არ იქნა ამ ქვეყანაში, არც უნივერსიტეტი იქნება, არც სამოქალაქო საზოგადოება და არც ბევრი სხვა ინსტიტუცია, რომელიც თავისუფლებას გულისხმობს, როგორც მთავარ ღირებულებას", — ამბობს გიგა ზედანია.

ილიას სახელმწიფო უნივერსიტეტის სტუდენტები ავტორიზაციის ერთი წლის თავზე მონიტორინგის პირობით მინიჭებას ე.წ. რუსული კანონის საწინააღმდეგო აქციებში ილიას სახელმწიფო უნივერსიტეტის სტუდენტების მონაწილეობაზე მმართველი გუნდის შურისძიებად აღიქვამენ და ამბობენ, რომ უნივერსიტეტი მკაფიო სამოქალაქო პოზიციის გამო ისჯება.

"ტექნიკური შეუსაბამობები, რაც არის საბჭოს დასკვნაში, მიუთითებს იმაზე, რომ ეს არის პოლიტიკურად მოტივირებული შანტაჟი უნივერსიტეტის წინააღმდეგ და ერთადერთი მიზანი, რაც შეიძლება იყოს, არის ბრძოლა დამოუკიდებელ აზრთან ამ საჯარო სივრცეში. რაც შეეხება სტუდენტების პოზიციას, არავინ სერიოზულად არ აღიქვამს ამ დასკვნას, ყველა აცნობიერებს საფუძვლებს ამ დასკვნის უკან და არ აპირებენ შეგუებას. მიმაჩნია, რომ ეს არის შურისძიება სამოქალაქო პოზიციის გამო როგორც უნივერსიტეტის, ისე სტუდენტების მიმართ", — ამბობს სტუდენტი დაჩი ხონელიძე.

"ილიაუნი ნამდვილად არის ერთ-ერთი ყველაზე პროგრესული სივრცე საქართველოში, სადაც თითოეულ სტუდენტს გვაქვს შესაძლებლობა მივიღოთ განათლება ევროპული სტანდარტებით. ეს სივრცე წარმოადგენს სტუდენტებისთვის, აკადემიური პერსონალისთვის და მთლიანად საქართველოსთვის ძალიან დიდ კეთილდღეობის წყაროს, უამრავი სფეროს განვითარებაში მიუძღვის წვლილი. სოლიდარობას ვუცხადებთ ჩვენს უნივერსიტეტს და იმედი გვაქვს გადაილახება ეს დაბრკოლება და უნივერსიტეტი შეძლებს დაუბრკოლებლად გააგრძელოს ფუნქციონირება",— აცხადებს სტუდენტი ნიცა ამბრიაშვილი.

ილიას სახელმწიფო უნივერსიტეტს სააპელაციო კომისიაში გასაჩივრების ვადა 26 ოქტომბერს ეწურება. აკადემიური პერსონალი აცხადებს, რომ, იმ შემთხვევაში, თუ სააპელაციო კომისია გადაწყვეტილებას საბჭოში არ დააბრუნებს, ილიას უნივერსიტეტის პერსონალი სამართლებრივ დავას როგორც საქართველოში, ისე საერთაშორისო ხარისხის მიმნიჭებელ ორგანიზაციებში გააგრძელებს.

უმაღლესი საგანმანათლებლო დაწესებულებების ავტორიზაციის საბჭომ ილიას სახელმწიფო უნივერსიტეტს ავტორიზაცია ერთი წლის თავზე მონიტორინგის ჩატარების პირობით მიანიჭა.