ორშაბათს, 14 სექტემბერს, გამთენიისას ისრაელმა ალ-აქსას საავადმყოფოზე საჰაერო თავდასხმა განახორციელა, რის შედეგადაც ოთხი ადამიანი გარდაიცვალა, ათეულობით დაშავდა და რამდენიმე მათგანი ცოცხლად დაწვა.

Al-Jazeera-ს ცნობით, საავადმყოფოს ტერიტორიას, ისრაელის ომის შედეგად, პალესტინის სხვა ტერიტორიებიდან გადასახლებული ადამიანები იყენებდნენ.

მედიაში გავრცელდა ვიდეოები, როგორ იწვიან ცოცხლად ადამიანები, მაშველები მათ გადარჩენას ცდილობენ, თუმცა, ძლიერი ცეცხლი გამო, ვერ ახერხებენ.

ისრაელის სამხედრო სპიკერი, ავიჩაი ადრეი ამბობს, რომ საჰაერო ძალებმა თავდასხმა საავადმყოფოს ტერიტორიაზე იმიტომ განახორციელეს, რომ, მათი აზრით, იქ პალესტინური ტერორისტული დაჯგუფება — ჰამასის "სამხედრო და კონტროლის" ცენტრი იყო.

ისრაელის სამხედროები ერთი წელია, რაც ღაზაში არსებულ სამედიცინო დაწესებულებებს თავს ესხმიან. გასული თვეების განმავლობაში ისრაელმა პალესტინის ხალხმრავალ ბანაკზე რამდენჯერმე განახორციელა იერიში. ამის მიზეზად ისინი ტერიტორიის ჰამასის სამხედრო მიზნებისთვის გამოყენებას ასახეკებენ.

Al-Jazeera-მ შემთხვევას გადარჩენილი რამდენიმე ადამიანი ჩაწერა:

"რაც მოხდა იყო ის, რომ გავიღვიძეთ კვამლში, ცეცხლში და ყველა მხრიდან კარვების დამწვარი ნაწილები ცვიოდა. ალ აქსას [საავადმყოფოს] უკან, მიმდებარე ტერიტორიაზე ვიყავით და საშინლად გვეშინოდა.

სახანძრო მანქანები ვერ აღწევდნენ იქამდე. ირგვლივ მრავალი დამწვარი და დანახშირებული ადამიანი იყო. ძლიერი ცეცხლი და აფეთქებები იყო. ჩვენ მომსწრე გავხდით ერთ-ერთი ყველაზე საშინელი და ბრუტალური ღამის", — განუცხადა Al-Jazeera-ს შემთხვევას გადარჩენილმა ომ აჰმად რადიმ.

ღაზაში მოხალისედ მყოფმა ქირურგმა მოჰამედ ტაჰირმა თქვა, რომ ადამიანებს 60-80%-იანი დამწვრობა ჰქონდათ და მათ უმეტესობაც ვერ გადარჩა.

"საშინელი სანახაობაა აქ. გულწრფელად გეუბნებით, ზოგჯერ ისეთი შეგრძნება მაქვს, რომ ეს არ არის რეალური ცხოვრება", — თქვა ტაჰირმა.

საავადმყოფოს ჩანაწერებზე დაყრდნობით, ოთხი ადამიანი გარდაიცვალა, ხოლო 40 დაიჭრა. ოცდახუთი ადამიანი სამხრეთ ღაზაში არსებულ ნასერის საავადმყოფოში მძიმე დამწვრობებით გადაიყვანეს.

ღაზას მედიაოფისის ინფორმაციით, წელს ეს უკვე მეშვიდე შემთხვევაა, როდესაც ისრაელმა მიზანში ამოიღო პალესტინელების თავშესაფრები და ბანაკები, ხოლო ბოლო რამდენიმე კვირის განმავლობაში თავდასხმის მესამე შემთხვევა დაფიქსირდა. თავდასხმამ 20 კარავი გაანადგურა, სადაც ოჯახები ცხოვრობდა.

გასულ კვირას, გაეროს დამოუკიდებელმა საერთაშორისო საგამოძიებო კომისიამ (COL) გამოაქვეყნა მოხსენება, სადაც ნათქვამია, რომ ისრაელი ახორციელებს "გამიზნულ პოლიტიკას ღაზას ჯანდაცვის სისტემის განადგურების მიზნით".

ამასთან, კვირას, 13 ოქტომბერს, ისრაელის ტანკებმა ცენტრალურ ღაზაში არსებული სკოლა დაბომბეს, სადაც ღაზაში არსებულ ლტოლვილთა ბანაკიდან — ნუსარეთიდან (პალესტინა) ომისგან დაზარალებული მოსახლეობა თავს აფარებდა, რასაც 22 ადამიანის სიცოცხლე იმსხვერპლა, ხოლო 80 დაშავდა.

ისრაელმა ღაზაში დიდი ტერიტორიები გაანადგურა, სადაც ომისგან გადასახლებული პალესტინელ ლტოლვილთა 90%, ანუ 2.3 მილიონი ადამიანი ცხოვრობდა.