ჯორჯო არმანი — ძვირადღირებული იტალიური მოდის სახლის დამფუძნებელი, რომელიც მის სახელს ატარებს — ამბობს, რომ მომდევნო ორი-სამი წლის განმავლობაში კარიერას დაასრულებს.

90 წლის ჯორჯო არმანი, რომელიც იტალიის ყველაზე ცნობილი მოდის დიზაინერია, აქამდე კარიერის დასრულების შესახებ არ საუბრობდა და თავის კომპანიას, რომელიც თითქმის 50 წლის წინ დაარსა აქტიურად ხელმძღვანელობდა.

"მე ჯერ კიდევ შემიძლია ორი ან სამი წელი კომპანიას ვუხელმძღვანელო. მეტი დროით დარჩენა, უარყოფით შედეგს მოიტანს. მალე მე აღარ უნდა ვიყო ის, ვინც იტყვის "დიახ" ან "არა" — განუცხადა არმანმა იტალიურ ყოველდღიურ გაზეთს Corriere della Sera.

კითხვაზე დარჩებოდა თუ არა აუცილებლობის შემთხვევაში აღნიშნულ თანამდებობაზე, არმანმა თქვა: "ღამით ვერ ვიძინებ. აღარ ვიცი რას ნიშნავს ის ღრმა და მშვიდი ძილი, რომელიც ადრე მქონდა."

არმანის თქმით, მას სურს, რომ კომპანიამ დამოუკიდებლობა შეინარჩუნოს, რადგან მან ეს ყველაფერი წლების განმავლობაში აშენა, აშენა ერთგვარი სტრუქტურა, პროექტი და პროტოკოლი, რომელსაც მემკვიდრეობად დატოვებს.

არმანი თავდაპირველად მედიცინას სწავლობდა, როდესაც ჯარში მსახურობდა. მოდის სფეროთი მოგვიანებით დაინტერესდა და კომპანია 1975 წელს დაარსა. ის წლების განმავლობაში თანამშრომლობდა სხვადასხვა ვარსკვლავთან, რომელთა შორის იყო რიჩარდ გირი, ერიკ კლეპტონი და ლედი გაგა.