საარჩევნო კამპანიის ფარგლებში, თელავში ჩასულმა ბიძინა ივანიშვილმა აღა-მაჰმად-ხანი და შაჰაბასი ერთმანეთში აურია. ამის შესახებ პოლიტიკოსები და ექსპერტები სოციალურ ქსელში წერენ.

"დღეს თელავში ქართული ოცნების დამფუძნებელმა ერთმანეთში აზილა აღა-მაჰმად-ხანი და შაჰაბასი (შაჰი აბას I), — წერს ევროპულ-ქართული ინსტიტუტის დირექტორი გიორგი მელაშვილი და კახეთში ქართული ოცნების საპატიო თავმჯდომარის გამოსვლას ეხმიანება.

"დღეს თელავში ქართული ოცნების დამფუძნებელმა ერთმანეთში აზილა აღა-მაჰმად-ხანი და შაჰაბასი (შაჰი აბას I).

როგორც ისტორია იცის მან და მისმა სპიჩრაითერმა, მთელი პარტიით, ასევე იციან საერთაშორისო ურთიერთობები.

ამიტომ აქვთ მტერი და მოყვარე არეული — განათლების მინისტრის გაქცევაც ამ სურათში, იდეალურად, ჯდება.

26 ოქტომბერს — ყველა არჩევნებზე”, — წერს მელაშვილი სოციალურ ქსელში.

ქართული ოცნების საპატიო თავმჯდომარის ამავე შეცდომაზე წერს, პოლიტიკოსი დავით ზურაბიშვილიც: "დიდი ამბავი აღა-მაჰმად-ხანი შაჰ-აბასში თუ აერია. რეიგანსაც ხომ დაავიწყდა ქართული ანდაზა?"

როგორც გახარია საქართველოსთვის ერთ-ერთი ლიდერი, თეონა აქუბარდია წერს, ერეკლე მეფეს რუსებმა რომ უღალატეს და გეორგიევსკის ტრაქტატით მფარველობის ნაცვლად მტერს მარტო შეატოვეს, საზოგადოებას ესეც კარგად ახსოვს.

"კრწანისის ბრძოლა ამას კახეთში ეგონა ხომ? ან ვაზი და აღა-მაჰმად-ხანი როგორ დააკავშირა? ისტორიის გადაწერასაც ცოდნა უნდა, ჯერ ნამდვილის ოღონდ. ჰო, ისე, ერეკლე მეფეს რუსებმა რომ უღალატეს და გეორგიევსკის ტრაქტატით მფარველობის ნაცვლად მტერს მარტო შეატოვეს, ეგეც გვახსოვს ბატონი ბიძინა," — წერს თეონა აქუბარდია.

შეგახსენებთ, რომ თელავში სიტყვით გამოსვლისას ივანიშვილმა თქვა, რომ "აღა-მაჰმად-ხანის შემოსევებს გადარჩენილი კახელი ადამიანი ვერასოდეს იფიქრებდა, რომ ქართული ვაზის თანამედროვე მტრად პასპორტით ქართველი, გონებით კი უსამშობლო ნაციონალური მოძრაობა მოევლინებოდა".