რუსეთში ტელეარხ არ ბე კას ჟურნალისტი ალექსანდრ სოკოლოვი ექსტრემიზმის ბრალდებით გაასამართლეს და 3,5 წლით პატიმრობა მიუსაჯეს. ჟურნალისტი თავს უდანაშაულოდ მიიჩნევს, რეპორტიორები საზღვრებს გარეშე და ორგანიზაცია მემორიალი კი, სოკოლოვსა და მასთან ერთად გასამართლებულ სხვა პირებს პოლიტპატიმრებს უწოდებენ.

ნოვაია გაზეტას ინფორმაციით, ალექსანდრ სოკოლოვსა და მის თანამოაზრეებს – ვალერი პარფიონოვს, კირილ ბარაბაშსა და იური მუხინს – სახელმწიფო ბრალდება ედავებოდა ექსტრემისტულ საქმიანობას. პარფიონოვსა და ბარაბაშს ოთხწლიანი პატიმრობა მიუსაჯეს, მუხინს კი – პირობითი სასჯელი.

საქმე ეხება საინიციატივო ჯგუფის მიერ 2015 წელს ვებსაიტის შექმნას, რომლის მიზანიც იყო რეფერენდუმის ჩასატარებლად მხარდაჭერის მოპოვება. რეფერენდუმზე კი უნდა გასულიყო კანონი "ანგარიშვალდებული მთავრობის შესახებ". აღნიშნული კანონი გულისხმობს მოქალაქეთა მიერ ხელისუფლებაში მყოფი პირების საქმიანობასა და მათ პასუხისგებას სამსახურეობრივი მოვალეობის არასათანადოდ შესრულებისთვის.

რუსეთის პროკურატურამ მიიჩნია, რომ საინიციატივო ჯგუფის იდეა შეიცავდა ექსტრემიზმის ნიშნებს, რადგან ის იყო მოძრაობა ხალხის ნების არმიის საქმიანობის გაგრძელება. აღნიშნული ანტისახელისუფლებო მოძრაობა რუსეთში 2010 წელს ექსტრემისტულად შეფასდა და აიკრძალა. ხალხის ნების არმია წლების წინს სწორედ იური მუხინმა დააფუძნა.

"გილოცავთ, რადგან რეფერენდუმის იდეა ექსტრემიზმად იქნა აღიარებული", – თქვა სასამართლო დარბაზში არ ბე კას ჟურნალისტმა ალექსანდრ სოკოლოვმა. ის და სხვა ბრალდებულები თავს უდანაშაულოდ მიიჩნევენ.

სოკოლოვი დარწმუნებულია, რომ სამართლებრივი დევნის მიზეზი თავისი ჟურნალისტური საქმიანობა გახდა კერძოდ, ის ჟურნალისტური გამოძიება, რომელიც ეხებოდა რუსეთში კოსმოდრომ "ვასტოჩნის" მშენებლობაზე თანხების მითვისება-გაფლანგვის საქმეს.

ალექსანდრ სოკოლოვი 2015 წელს დააპატიმრეს. ტელეარხმა, სადაც ის მუშაობდა, პირადად ვლადიმერ პუტინსაც კი მიმართა ჟურნალისტის საქმის გარკვევის თხოვნით.

რუსეთის პრეზიდენტმა მაშინ არხს პირობა მისცა: "თუ ის ციხეში "ვასტოჩინის" შესახებ რაიმეს გამჟღავნებისთვის ზის და საქმე მხოლოდ ამას ეხება, მე უსიტყვოდ დავეხმარები თქვენს რედაქციას".

პუტინის ამ დაპირებიდან ერთი წლის შემდეგ არაფერი არ შეცვლილა, რის გამოც ტელეარხმა მას პირობა შეახსენა, რაზეც რუსეთის პირველი პირის პასუხი ასეთი იყო:

"თუ არაფერი არ შეცვლილა, როგორც ჩანს, აქ ყველაფერი ასე მარტივად არ იყო".