რუსეთის ფედერაციამ ევროსასამართლოს განაჩენი აღასრულა და 2006 წელს დეპორტირებულ ქართველს, ლია შიოშვილს კომპენსაციის სახით 30 ათასი ევრო გადაუხადა.

შიოშვილის ინტერესებს ადამიანის უფლებათა ევროპულ სასამარლოში არასამთავრობო ორგანიზაცია კონსტიტუციის 42-ე მუხლი იცავდა.

ორგანიზაციის ცნობით, 2006 წლის 20 ოქტომბერს, რუსმა სამართალდამცველებმა რვა თვის ფეხმძიმე ლია შიოშვილი, ოთხ მცირეწლოვან შვილთან ერთად, მოსკოვის ოლქის ქალაქ რუზაში დააპატიმრეს. შემდეგ კი უკვე ცხრა თვის ფეხმძიმეს, საქართველოსკენ მატარებლით მგზავრობისას დაღესტანში, ქალაქ დერბენდში დოკუმენტების გაუმართაობის მოტივით გზის გაგრძელების შესაძლებლობა აღარ მისცეს. ასთმით დაავადებული ცხრა თვის ფეხმძიმე ქალი 4 მცირეწლოვან ბავშვთან და სხვა ქართველებთან ერთად 2 კვირის განმავლობაში გაუსაძლის პირობებში იმყოფებოდა. უკიდურესად გაწამებულმა ქართულმა ოჯახმა, მხოლოდ დეკემბრის დასაწყისში შეძლო ფეხით გადმოევლო დაღესტან - აზერბაიჯანის საზღვარი. 15 დეკემბერს კი გურჯაანის საავადმყოფოში ლია შიოშვილის მშობიარობა უმძიმესი შედეგით დასრულდა.

კრემლის ანტიქართულ კამპანიას 2006 – 2007 წლებში 7000 – ზე მეტი საქართველოს მოქალაქის დეპორტაცია მოჰყვა.

ორგანიზაცია კონსტიტუციის 42-ე მუხლი ლია შიოლაშვილის გარდა, 12 დეპორტირებულის უფლებებს იცავს ადამიანის უფლებათა ევროპულ სასამართლოში.