ოპოზიციურმა ტელეგრამ-არხმა დოკუმენტი გამოაქვეყნა სადაც წერია, რომ რუსეთმა აფხაზეთის მთავრობას საბიუჯეტო დახმარება შეუწყვიტა. ამას გარდა, ტელეგრამ-არხი წერს, რომ რუსეთი გადაწყვეტილებას მანამ არ შეცვლის, ვიდრე აფხაზეთში პრო-რუსული რეფორმები არ განხორციელდება მათ შორის, აფხაზეთში უძრავი ქონების შესყიდვის შეზღუდვების მოხსნა რუსეთის მოქალაქეებისთვის.

OC Media-ს ცნობით, ეს დოკუმენტი ოპოზიციურმა ტელეგრამ-არხმა აფხაზ პორტალმა გამოაქვეყნა და, სავარაუდოდ, ოკუპირებული აფხაზეთის პრეზიდენტ ასლან ბჟანიასა და რუსეთის პრეზიდენტის ადმინისტრაციის უფროსის მოადგილის, დიმიტრი კოზაკის შეხვედრის ოქმია, რომელიც 19 აგვისტოსაა გაფორმებული.

საბიუჯეტო დაფინანსების შეჩერებასთან ერთად დოკუმენტში წერია, რომ პრეზიდენტმა ბჟანიამ რუსეთს უნდა მიაწოდოს დეტალური ინფორმაცია იმ აფხაზ დეპუტატებსა და ოპოზიციის წარმომადგენლებზე, რომლებიც "რუსეთის ფედერაციის ინტერესების და რუსეთ-აფხაზეთის ურთიერთობის განვითარების საზიანოდ იქცეოდნენ".

ამას გარდა, რუსეთი ავალებს რუს მაღალჩინოსნებს, რომ გაწყვიტონ კავშირები აფხაზ ოპოზიციონერებთან, რადგან "მათ არ აქვთ კონსტრუქციული პოზიცია რუსული მხარის წინაშე ვალდებულებების შესრულებასთან დაკავშირებით". ამას გარდა, მათთვის რუსეთის მოქალაქეობის ჩამორთმევაც განიხილება.

დოკუმენტში ასევე ნათქვამია, რომ რუსული ელექტრონაკადები 2024 წლის შემოდგომა-ზამთრის პერიოდში აფხაზეთს კომერციულ ფასად მიეწოდება. აქამდე რუსეთის მხრიდან გაზის მიწოდება აფხაზეთისთვის სუბსიდირებული იყო.

დოკუმენტის მიხედვით, რუსეთი აფხაზეთში, რუსეთის სოციალურ-ეკონომიკური განვითარების პროგრამის ფარგლებში, რუსი ინვესტორებისთვის უძრავი ქონების ბაზარზე შეზღუდვების მოხსნას ითხოვს. უძრავი ქონების ყიდვის საკითხი დიდი ხანია, რაც რუსეთსა და აფხაზეთს შორის საკამათოა.

ივნისში აფხაზეთის მთავრობა იძულებული გახდა, უარი ეთქვა კანონპროექტზე, რომელიც უცხოელებზე უძრავი ქონების მიყიდვის ლეგალიზებას გულისხმობდა. როგორც აღმოჩნდა, მთავრობას არ ჰქონდა საჭირო რაოდენობის ხმები პარლამენტში, რომ კანონი მიეღო.

სავარაუდოდ, ამ და სხვა საკითხებმა, მათ შორის, ბიჭვინთის სახელმწიფო აგარაკების რუსეთისთვის გადაცემამ, დიდი პროტესტი გამოიწვია აფხაზებში და მზარდი განხეთქილება აფხაზეთსა და რუსეთს შორის.

დოკუმენტში სხვა მოთხოვნები მოიცავდა აფხაზეთის მიერ რუსეთთან შეთანხმების რატიფიცირებას ეკონომიკურ საკითხებში სასამართლო და საარბიტრაჟო გადაწყვეტილებების აღიარებისა და აღსრულების შესახებ.

აფხაზეთის პრეზიდენტის ადმინისტრაციამ განაცხადა, რომ პრეზიდენტ ბჟანიას არ ჰქონდა უფლება, დეპუტატებისა და ოპოზიციის ლიდერების შესახებ ინფორმაცია მიეწოდებინა რუსეთისთვის. თუმცა, პრეზიდენტის ოფისს დოკუმენტის ავთენტიკურობაზე, ან მასში შემავალ სხვა თემებზე არ უდავია.

აფხაზი ჟურნალისტი ინალ ხაშიგი ამტკიცებდა, რომ ადგილობრივი სამართალდამცავი უწყებები ვალდებულნი იყვნენ შეესწავლათ დოკუმენტი და გაერკვიათ მისი წარმომავლობა.

„თუ დოკუმენტი ყალბია, მაშინ იპოვეთ ორიგინალი, თუ ავთენტიკურია, მაშინ პრეზიდენტი ვადამდე უნდა გადადგეს და ყველა სისხლის სამართლის საპროცესო ქმედება უნდა განხორციელდეს მის წინააღმდეგ", — დაწერა ხაშინგიმ ტელეგრამ-არხზე.

ზოგიერთმა ოპოზიციურმა მედიასაშუალებამ პრეზიდენტი ბჟანია და პრემიერ-მინისტრი ალექსანდრე ანქვაბი შეუსრულებელი ვალდებულებების აღებაში დაადანაშაულეს, რათა თავიდან აეცილებინათ ურთიერთობების გაფუჭება რუსეთთან და ამით დააღალატეს მთელი აფხაზი ხალხი. პრეზიდენტმა პუტინმა აფხაზეთს, 26 აგვისტოს, რუსეთის მხრიდან აფხაზეთის დამოუკიდებლობის აღიარების დღეც არ მიულოცა. ბოლო პერიოდში, რამდენიმე ანონიმურმა პრო-რუსულმა ტელეგრამ-არხმა ბჟანიას შესახებ კრიტიკული პოსტების გამოქვეყნებაც დაიწყეს.

რუსეთმა ასევე მოულოდნელად გააუქმა სამთავრობათაშორისო კომისიის სხდომა, რომელიც 26 აგვისტოს უნდა ჩატარებულიყო. რუსმა ჟურნალისტმა, ანონიმურობის დაცვით, განუცხადა OC Media-ს, რომ რუსმა დელეგატებმა უკვე იყიდეს თვითმფრინავის ბილეთ და დაჯავშნეს სასტუმროები შეხვედრისთვის.