მოსკოვის გოლოვინსკის რაიონულმა სასამართლომ ტელეარხ "დოჟდის" მთავარ რედაქტორს, ტიხონ ძიატკოს, დაუსწრებლად რვა წლით თავისუფლების აღკვეთა მიუსაჯა. გადაწყვეტილების საფუძველი რუსული არმიის შესახებ ე.წ. "ყალბი ინფორმაციის" გავრცელება გახდა. ინფორმაციას ამის შესახებ გამოცემა Meduza მოსკოვის სასამართლოს პრესსამსახურზე დაყრდნობით ავრცელებს.

პატიმრობასთან ერთად, ჟურნალისტს 250 000 რუბლის ოდენობის ჯარიმა დაეკისრა და ოთხი წლის განმავლობაში სოციალური მედიით სარგებლობა აეკრძალა. აღსანიშნავია, რომ პროკურატურა ძიადკოსთვის გაცილებით მაღალ ფინანსურ სანქციას — 5,9 მილიონ რუბლს ითხოვდა.

სისხლის სამართლის საქმე ტიხონ ძიატკოს ტელეგრამ არხზე გამოქვეყნებულ ორ პოსტს უკავშირდება. ბრალდების მხარის მტკიცებით, აღნიშნული პუბლიკაციები შეიცავდა "დეზინფორმაციას" უკრაინაში რუსი ჯარისკაცების მხრიდან განხორციელებული ძალადობის შესახებ.

"მედიაზონას" განმარტებით, პოსტები რეალურად მოიცავდა ბმულებს ტელეარხ "დოჟდის" რეპორტაჟსა და გამოცემა The New York Times-ის საგამოძიებო მასალაზე, რომელიც ბუჩასა და ირპენში მშვიდობიანი მოსახლეობის მკვლელობის ფაქტებს ასახავდა.

შეგახსენებთ, ტიხონ ძიატკოს წინააღმდეგ აქტიური სამართლებრივი დევნა 2025 წლის ოქტომბრიდან დაიწყო. სასამართლომ ის დაუსწრებლად დააკავა და "ტერორისტებისა და ექსტრემისტების" სიაში შეიყვანა.

ცნობისთვის, ტიხონ ძიადკო არ არის ერთადერთი ჟურნალისტი ამ მედიასაშუალებიდან, რომელსაც რუსულმა მართლმსაჯულებამ ანალოგიური განაჩენი გამოუტანა. მანამდე, მოსკოვის სასამართლომ რვაწლიანი პატიმრობა დაუსწრებლად მიუსაჯა "დოჟდის"ტელეწამყვანს, ეკატერინე კოტრიკაძეს.